အာဆင်နယ်အသင်းနည်းပြ မီကဲလ်အာတီတာက အသင်းခေါင်းဆောင် မာတင် အိုဒီဂတ်အပေါ် ဝေဖန်မှုတွေနဲ့ပတ်သက်ပြီး ကာကွယ်ပြောကြားခဲ့ပါတယ်။ အာတီတာက အာဆင်နယ်ကစားသမားတွေဟာ အိုဒီဂတ်ကို ကပ္ပတိန်အဖြစ် ဆက်လက်ထားရှိဖို့ မဲအပြတ်အသတ်ပေးခဲ့ကြတယ်လို့ ဆိုပါတယ်။
အာဆင်နယ်ကပ္ပတိန်ဟောင်း တိုနီအဒမ်စ်က အိုဒီဂတ်ကို ကပ္ပတိန်အဖြစ် ဆက်ထားရင် လိဂ်ဖလားရရှိမှာမဟုတ်ဘူးလို့ ပြောကြားခဲ့ပြီး ဒီကလန်ရိုက်စ်ကို ကပ္ပတိန်အဖြစ် ခန့်အပ်ဖို့ အာတီတာကို တိုက်တွန်းခဲ့ဖူးပါတယ်။ ဒါပေမဲ့ အာတီတာကတော့ ဂျော်ဂျင်ဟိုထွက်ခွာသွားပြီးနောက် အသင်းခေါင်းဆောင်အဖွဲ့ကို ပြန်လည်ဖွဲ့စည်းဖို့ အခွင့်အရေးရှိခဲ့ပေမဲ့ ၂၀၂၂ ခုနှစ်ကတည်းက ကပ္ပတိန်တာဝန်ယူထားတဲ့ အိုဒီဂတ်ကိုပဲ ဆက်လက်ထားရှိဖို့ ဆုံးဖြတ်ခဲ့တယ်လို့ ပြောပါတယ်။
“ကျွန်တော့်အမြင်ကတော့ ရှင်းပါတယ်။ ဒါက ကျွန်တော့်အမြင်သက်သက်မဟုတ်ပါဘူး။ ဝန်ထမ်းတွေအားလုံးနဲ့ အထူးသဖြင့် ကစားသမားတွေရဲ့ အမြင်ပါ။ ကပ္ပတိန်အတွက် မဲပေးဖို့ သူတို့ကို ကျွန်တော် တောင်းဆိုခဲ့ပါတယ်။ ရလဒ်တွေက မနေ့ကမှထွက်လာတာပါ။ လူတိုင်းက မာတင်အိုဒီဂတ်ကိုပဲ ရွေးချယ်ခဲ့ကြတာပါ။ ဒါဟာ သူတို့ရဲ့ကပ္ပတိန် ဘယ်သူဖြစ်သင့်တယ်ဆိုတဲ့ ခံစားချက်ကို ပြသနေတဲ့ အရှင်းလင်းဆုံးလက္ခဏာပါပဲ။ အသင်းကို ကာကွယ်ဖို့၊ တိုးတက်ဖို့နဲ့ ကျွန်တော်တို့ အနိုင်ရချင်တဲ့ပွဲစဉ်တွေကို အနိုင်ရဖို့အတွက်ပါပဲ။ ဒီကိစ္စနဲ့ပတ်သက်ပြီး မေးစရာမရှိပါဘူး” လို့ အာတီတာက ပြောပါတယ်။
အာတီတာက ခေါင်းဆောင်မှုဆုံးဖြတ်ချက်တွေမှာ ကစားသမားတွေရဲ့ ထင်မြင်ယူဆချက်တွေပါဝင်တာဟာ အရေးကြီးတယ်လို့လည်း အလေးအနက်ထားပြောကြားခဲ့ပါတယ်။
Source : nytimes.com
