ရီးရဲလ်မက်ဒရစ်နည်းပြ အာဘီလိုအာက ခီလီယန် အမ်ဘာပေဟာ မန်စီးတီးနဲ့ ချန်ပီယံလိဂ်ပွဲစဉ်မှာပါဝင်ဖို့ မသေချာဘူးလို့ တနင်္ဂနွေနေ့မှာ ဝန်ခံပြောကြားလိုက်ပါတယ်။ ရီးရဲလ်မက်ဒရစ်အသင်းအနေနဲ့ အမ်ဘာပေရဲ့ ဒူးဒဏ်ရာပြဿနာကို သေချာသိရှိပေမဲ့ မန်စီးတီးနဲ့ပွဲမှာ ပါဝင်နိုင်ဖို့ကတော့ မသေချာဘူးလို့ ဆိုပါတယ်။ အမ်ဘာပေဟာ ဒီအပတ်ထဲမှာပဲ အကန့်အသတ်မရှိ အနားယူရမယ်လို့ သတင်းထွက်ပေါ်လာခဲ့တာပါ။
အမ်ဘာပေဟာ ခရစ္စမတ်မတိုင်ခင်ကတည်းက သူ့ရဲ့ ဘယ်ဘက်ဒူးမှာ မသက်မသာဖြစ်နေတဲ့ ဒဏ်ရာကြောင့် အခက်တွေ့နေတာပါ။ ရီးရဲလ်မက်ဒရစ်အသင်းကတော့ ဒီဒဏ်ရာကို စီမံခန့်ခွဲဖို့အတွက် ပြီးခဲ့တဲ့ဒီဇင်ဘာလတုန်းက မန်စီးတီးနဲ့ပွဲ၊ စပိန်စူပါဖလား ဆီမီးဖိုင်နယ်နဲ့ ပြီးခဲ့တဲ့လက ရီးရဲလ် ဆိုစီဒက်ကို အနိုင်ရတဲ့ပွဲတွေမှာ သူ့ကို အခါအားလျော်စွာ အနားပေးခဲ့ပါတယ်။
ကလပ်အသင်းဘက်ကတော့ ဒဏ်ရာအခြေအနေနဲ့ ပတ်သက်ပြီး အသေးစိတ်ဆေးမှတ်တမ်း ထုတ်ပြန်ထားခြင်း မရှိပါဘူး။ ဒါပေမဲ့ အမ်ဘာပေအနေနဲ့ ဘင်ဖီကာနဲ့ ချန်ပီယံလိဂ် ပလေးအော့ဖ် ဒုတိယအကျော့ကို လွဲချော်ခဲ့တုန်းက “ဒါဟာ ရက်ပိုင်းလောက်နဲ့ သက်သာမှာမဟုတ်ဘဲ ပိုကြာနိုင်တယ်” လို့ အာဘီလိုအာက ဝန်ခံခဲ့ပါတယ်။
“ကျွန်တော်တို့အတွက်တော့ ဘာဖြစ်နေလဲ၊ အခုဘာလိုချင်လဲဆိုတာ အရမ်းရှင်းပါတယ်။ အမ်ဘာပေကို သူ့ရဲ့ဒဏ်ရာကနေ အပြည့်အဝသက်သာစေချင်တာပါ။ ဒါမှ သူက ၁၀၀ ရာခိုင်နှုန်း ယုံကြည်မှုအပြည့်နဲ့ ပြန်လာနိုင်မှာပါ။ ဒဏ်ရာတွေ လုံးဝပျောက်ကင်းသွားတဲ့အချိန်မှပဲ သူပြန်ကစားရမှာပါ” လို့ ဂီတာဖေးနဲ့ပွဲမတိုင်ခင် သတင်းစာရှင်းလင်းပွဲမှာ အာဘီလိုအာက ပြောခဲ့ပါတယ်။
တနင်္လာနေ့မှာ ဂီတာဖေးကို အိမ်ကွင်းမှာ လက်ခံကစားပြီးရင် ရီးရဲလ်ဟာ သောကြာနေ့မှာ ဆယ်လ်တာဗီဂိုဆီ သွားရောက်ကစားရမှာဖြစ်ပြီး မတ်လ ၁၁ ရက် ဗုဒ္ဓဟူးနေ့မှာတော့ ဘာနေဗျူးကွင်းမှာ မန်စီးတီးနဲ့ ကစားရမှာပါ။ အဲ့ဒီနောက် မတ်လ ၁၄ ရက်မှာ အယ်လ်ချေးနဲ့ ကစားရမှာဖြစ်ပြီး မတ်လ ၁၇ ရက်မှာတော့ မန်ချက်စတာမှာ ဒုတိယအကျော့ ပြန်လည်ကစားရမှာ ဖြစ်ပါတယ်။
“တစ်ရက်ချင်းစီရဲ့ အခြေအနေကို စောင့်ကြည့်ရမှာပါ” လို့ မန်စီးတီးနဲ့ပွဲမှာ အမ်ဘာပေ ပါဝင်နိုင်မလားဆိုတဲ့ မေးခွန်းကို အာဘီလိုအာက ဖြေကြားခဲ့ပါတယ်။ “သူ့ရဲ့ ခံစားချက်နဲ့ ပြန်လည်သက်သာလာမှုအပေါ်မှာပဲ မူတည်ပါတယ်။”
“လောလောဆယ်တော့ ဘယ်လောက်ကြာမယ်ဆိုတာကို အချိန်ကာလ အတိအကျမပြောတာ ပိုကောင်းပါတယ်။ သူ့ရဲ့ အခြေအနေကိုကြည့်ပြီးမှ ကျွန်တော်တို့ ဆုံးဖြတ်မှာပါ။ သူ ၁၀၀ ရာခိုင်နှုန်း ကြံ့ခိုင်မှု ပြည့်ဝမှပဲ ပြန်လာစေချင်တာပါ” လို့ သူက ဆက်ပြောပါတယ်။
အမ်ဘာပေလို ကစားသမားမျိုးတွေက နွေရာသီမှာကစားမဲ့ ကမ္ဘာ့ဖလားအတွက် ဒဏ်ရာကို အစွန်းမထွက်အောင် ဂရုစိုက်နေတာမျိုး ရှိမလားဆိုတဲ့အပေါ်မှာတော့ အာဘီလိုအာက ငြင်းဆိုလိုက်ပါတယ်။
“ကျွန်တော် ကစားသမားဘဝတုန်းက ကလပ်အသင်းအတွက် အကုန်ပေးဆပ်ခဲ့သလို နိုင်ငံအသင်းအတွက်လည်း အကုန်ပေးဆပ်ခဲ့တာပါ။ ရီးရဲလ်မက်ဒရစ်အတွက် အစွမ်းကုန်မပေးဆပ်ဘဲ အားချန်ထားတဲ့ ကစားသမားတွေကို ကျွန်တော် နားမလည်နိုင်ပါဘူး။ လာမဲ့လတွေမှာလည်း ဒီလိုပဲ ဖြစ်လာမှာပါ။ ကမ္ဘာ့ဖလားကိုသွားဖို့ အကောင်းဆုံးနည်းလမ်းက ကလပ်အသင်းမှာ အစွမ်းပြနေဖို့ပါပဲ” လို့ စပိန်လက်ရွေးစင်ဟောင်း အာဘီလိုအာက ဆိုပါတယ်။ ရီးရဲလ်ဟာ ဗီလာရီးရဲလ်ကို ၄-၁ နဲ့ နိုင်ထားတဲ့ ဘာစီလိုနာရဲ့နောက် ၄ မှတ်အကွာမှာ ရှိနေပါတယ်။
Source : https://www.espn.co.uk/
