အီတလီစီးရီးအေကလပ် နာပိုလီဟာ လာမဲ့ဇန်နဝါရီအပြောင်းအရွှေ့ကာလမှာ မန်ချက်စတာယူနိုက်တက်ကွင်းလယ်ကြယ်ပွင့် ကိုဘီမိုင်နူးကို အမိအရခေါ်ယူနိုင်မယ်လို့ မျှော်လင့်ထားကြောင်း အီတလီသတင်းတွေကဖော်ပြလာခဲ့ပါတယ်။
အသက်-၂၀ နှစ်အရွယ် မိုင်နူးဟာ ယခုရာသီမှာ နည်းပြရူဘင်အာမိုရင်ရဲ့မျက်နှာသာပေးခြင်းမခံရတာကြောင့် ကတ်စ်မဲရိုးနဲ့ အသင်းခေါင်းဆောင် ဘရူနိုဖာနန်ဒက်စ်တို့နောက် တတိယဦးစားပေးကစားသမားအနေနဲ့သာ သတ်မှတ်ခံထားရပြီး အခုချိန် ပရီးမီးယားလိဂ်မှာ ပွဲထွက်ခွင့်မရသေးပါဘူး။ နည်းပြအာမိုရင်ကိုယ်တိုင်က မိုင်နူးဟာ နံပါတ် ၈ နေရာအတွက် အသင်းခေါင်းဆောင် ဖာနန်ဒက်စ်နဲ့ ယှဉ်ပြိုင်သွားရမယ်လို့ ပြောကြားထားတာကြောင့် အသင်းသစ်သို့ပြောင်းရွှေ့ဖို့ စိတ်အားထက်သန်နေတာလည်းဖြစ်ပါတယ်။
ကစားသမားဟာ အရည်အသွေးရှိပေမဲ့ အာမိုရင်ရဲ့လက်အောက်မှာနေရာမရတာကြောင့် ယူနိုက်တက်ကြယ်ပွင့်ကစားသမားဟောင်း နစ်ကီဘတ်က သူ့အနေနဲ့ မိုင်နူးဘာကြောင့် ပွဲထွက်ခွင့်မရသလဲဆိုတာ နားမလည်နိုင်ကြောင်းပြောကြားထားပါတယ်။ ဒါ့အပြင် နစ်ကီဘတ်က ယူနိုက်တက်ဟာ မိုင်နူးလိုကစားသမားမျိုးကို အခြားအသင်းမှမြင်တွေ့ပါက ပေါင်သန်း ၇၀ လောက်အထိအကုန်ကျခံပြီး ခေါ်ယူဖွယ်ရှိကြောင်း ပြောကြားခဲ့ပါတယ်။
တစ်ချိန်တည်းမှာပဲ ယူနိုက်တက်ကစားသမားဟောင်း ဝက်စ်ဘရောင်းကလည်း နစ်ကီဘတ်ရဲ့အမြင်ကို ထောက်ခံခဲ့ပြီး အာမိုရင်အနေနဲ့ မိုင်နူးကို ပွဲထုတ်သင့်ကြောင်း အကြံပေးထားပါတယ်။ မိုင်နူးအနေနဲ့လည်း ကမ္ဘာ့ဖလားပြိုင်ပွဲမှာ အင်္ဂလန်ကိုကိုယ်စားပြုလိုတာကြောင့် ယူနိုက်တက်မှာနေရာမရပါက အခြားထိပ်သီးကလပ်သို့ပြောင်းရွှေ့နိုင်ဖို့ ကြိုးစားသွားဖွယ်ရှိပါတယ်။
ယခုအခါမှာ နာပိုလီသတင်းစာတစ်ခုက “ဇန်နဝါရီမှာမိုင်နူး အသင်းကိုရောက်လာမှာသေချာပါတယ်။ ပြီးခဲ့တဲ့နှစ်ဆောင်းရာသီကတည်းက ခဗာရက်စ်ခီလီယာထွက်သွားတော့ မိုင်နူးရောက်လာမယ်လို့ မျှော်လင့်ထားခဲ့ပါတယ်။ ပြီးတော့ မိုင်နူးက အသင်းဖော်ဟောင်း မက်တိုမီနေးနဲ့ အဆက်အသွယ်ရှိနေလို့ ဒီကိုလာဖို့ ဆန္ဒရှိနေပါတယ်။ ယူနိုက်တက်နဲ့နာပိုလီတို့က စာချုပ်အတွက်လည်းဆွေးနွေးထားကြပါတယ်။ မိုင်နူးရောက်လာမယ်ဆိုရင် အပြောင်းအရွှေ့ကာလ အစောပိုင်းအချိန်မှာပဲ ဖြစ်ပါလိမ့်မယ်” လို့ရေးသားဖော်ပြထားတာဖြစ်ပါတယ်။
Source : sports.yahoo.com
