ဝေဖန်မှုတွေကြောင့် မင်းသားပက်ခ်ဆန်းဟွမ် “The Tyrant’s Chef” ဒရာမာမှ နှုတ်ထွက်

တောင်ကိုရီးယားမင်းသားပက်ခ်ဆန်းဟွမ်ဟာ ဒရာမာသစ် “The Tyrant’s Chef” ခေါင်းဆောင်မင်းသား ကာရိုက်တာမှ နှုတ်ထွက်သွားခဲ့ပါတယ်။

၂၀၂၄ ခုနှစ် ဒီဇင်ဘာလ အစောပိုင်းက ပက်ခ်ဆန်းဟွမ်ဟာ မင်းသမီး ယွန်းအေနဲ့အတူ ဒရာမာသစ် “The Tyrant’s Chef” မှာ အမျိုးသားဇာတ်ဆောင်အဖြစ် ပါဝင်သရုပ်ဆောင်ဖို့ ကမ်းလှမ်းမှုကို လက်ခံရရှိထားခဲ့ပါတယ်။

ဒါပေမဲ့ ပက်ခ်ဆန်းဟွမ်ဟာ သူပါဝင်တဲ့ “Squid Game” Season 2 ဒရာမာရဲ့ပိုစတာကို ဂျပန်လူကြီးကား ပိုစတာနဲ့ မှားယွင်းပြီး Instagram Story မှာ တင်ခဲ့ပါတယ်။ အဲဒီ story ကို ချက်ချင်းပြန်ဖျက်ခဲ့ပေမဲ့ လက်မြန်တဲ့ အင်တာနက်သုံးစွဲသူတွေကြောင့် ဝေဖန်ခံနေရပြီး သူ့ရဲ့နောက်ထပ်ရိုက်ကူးမဲ့ ဇာတ်ကား “The Tyrant’s Chef” အပေါ် ရိုက်ခတ်မှုတွေ ရှိလာခဲ့ပါတယ်။

ပက်ခ်ဆန်းဟွမ်ရဲ့အေဂျင်စီ BH Entertainment က ဒါဟာ မတော်တဆ မှားယွင်းတင်ခဲ့မိခြင်းဖြစ်တယ်ဆိုတာကို ရှင်းလင်းပြောကြားခဲ့ပေမဲ့ ပက်ခ်ဆန်းဟွမ်ကို “The Tyrant’s Chef” ကာရိုက်တာမှ နှုတ်ထွက်ဖို့ တောင်းဆိုမှု တွေ မြင့်မားလာခဲ့ပါတယ်။

ဒါကြောင့် ဇန်နဝါရီလ ၁၂ ရက်မှာတော့ “The Tyrant’s Chef” ဒရာမာရုပ်ရှင်ထုတ်လုပ်ရေးကုမ္ပဏီ Studio Dragon က ထုတ်လုပ်ရေးအဖွဲ့နဲ့ ပက်ခ်ဆန်းဟွမ်ရဲ့ကိုယ်စားလှယ်တွေကြား ဆွေးနွေးမှုများစွာပြုလုပ်ပြီးနောက် သူ့အနေနဲ့ ဒီပရောဂျက်မှာ ပါဝင်ဖို့ ခက်ခဲမယ်လို့ ဆုံးဖြတ်ချက်ချခဲ့ပြီး ကျွန်တော်တို့ရဲ့ဆွေးနွေးမှုတွေကြောင့် ပက်ခ်ဆန်းဟို ဟာ ထုတ်လုပ်ရေးအဖွဲ့နဲ့ နှုတ်ဆက်ခွဲခွာဖို့ ဆုံးဖြတ်ခဲ့ပါတယ်” လို့ ပြောကြားခဲ့ပါတယ်။

အဲဒီဇာတ်ကားအတွက် သရုပ်ဆောင်ရွေးချယ်ဖို့နဲ့ ဇာတ်ညွှန်းဖတ် အချိန်ဇယားကိုတော့ မဆုံးဖြတ်ရသေးဘူးလို့ Studio Dragon က ထပ်လောင်းပြောကြားခဲ့ပါတယ်။ ပက်ခ်ဆန်းဟွမ်ဟာ “Squid Game” Season 2 မှာ ပါဝင်ခဲ့တဲ့ သူ့ကာရိုက်တာကြောင့် ပရိသတ်များစွာ သတိထားမိနေသူ ဖြစ်ပါတယ်။

Source : koreatimes.co.kr