အလီဂျန်ဒရိုဂါနာချို ကို ယူနိုက်တက် ပထမအသင်းရဲ့ အစီအစဉ်များမှ နည်းပြ ရူဘင်အာမိုရင်က ဖယ်ထုတ်လိုက်ပြီဖြစ်ပြီး သူ့ရဲ့ ဆုံးဖြတ်ချက်ဟာ ပုဂ္ဂိုလ်ရေးအရ မဟုတ်ကြောင်း ပေါ်တူဂီနည်းပြက အခိုင်အမာ ပြောကြားခဲ့ပါတယ်။
အာဂျင်တီးနားကစားသမားဟာ အဓိကအသင်းမှခွဲထွက်၍လေ့ကျင့်နေပြီး ယခုအခါ ယူနိုက်တက်မှထွက်ခွာရန်မျှော်လင့်ရပြီး ချဲလ်ဆီး နှင့် အက်စတွန်ဗီလာတို့က ယခုနွေရာသီတွင် တောင်ပံကစားသမားကို ခေါ်ယူရန် ပြင်းထန်စွာ စိတ်ဝင်စားနေပါတယ်။
အာမိုရင်ဟာ ၂၀၂၅-၂၆ ရာသီ မတိုင်မီ ရာသီကြို လေ့ကျင့်ရေးကာလအတွင်း ဂါနာချိုကို ယူနိုက်တက်ရဲ့ ‘Bomb Squad’ လို့ခေါ်သော အဖွဲ့သို့ ပြောင်းရွှေ့ခဲ့ပြီး ပထမအသင်းမှခွဲထွက်၍ လေ့ကျင့်စေခဲ့ပါတယ်။ ကလပ်အသင်းက အမေရိကန်ပြည်ထောင်စုသို့ ခရီးထွက်ခဲ့စဉ် အသက် ၂၁ နှစ်အရွယ် ကစားသမားကို ချန်ထားခဲ့ပြီး အနာဂတ်မှာ စပို့တင်းနည်းပြဟောင်းက ထုတ်ဖော်ပြောကြားခဲ့တဲ့အတိုင်း အတိအကျနီးပါး ဖြစ်နေပြီဖြစ်ပါတယ်။
မီဒီယာများကို ပြောကြားရာတွင်အာမိုရင်က “ဂါနာချိုက တကယ်ကို အရည်အချင်းရှိတဲ့ ကောင်လေးတစ်ယောက်ပါ၊ ဒါပေမဲ့ တစ်ခါတလေကျတော့ အဆင်မပြေတာမျိုးတွေ ရှိတတ်တယ်ဗျာ။ ဘာဖြစ်လို့လဲဆိုတာ တိတိကျကျ ပြောပြလို့ မရဘူး။ ဒါပေမဲ့ ဂါနာချိုက မတူညီတဲ့ ခေါင်းဆောင်မှုပုံစံနဲ့ တခြားအရာတွေကို လိုချင်နေတယ်လို့ ကျွန်တော် ခံစားရတယ်။ ပြီးတော့ ဒါကို ကျွန်တော် နားလည်နိုင်ပါတယ်။ ပြဿနာမဟုတ်ပါဘူး။ တစ်ခါတလေကျတော့ လူတစ်ယောက်နဲ့ လိုက်လျောညီထွေဖြစ်ပြီး ဆက်သွယ်မှုရသွားတာမျိုးရှိသလို၊ တခြားအချိန်တွေမှာတော့ စိန်ခေါ်မှုအသစ်တစ်ခုကို လိုချင်တာမျိုးလည်း ရှိနိုင်တယ်။ ကျွန်တော်တို့ အသင်းအတွက်၊ နည်းပြအတွက်နဲ့ ကစားသမားတွေအတွက် အားလုံးအဆင်ပြေအောင် လုပ်ပေးဖို့ ကြိုးစားပါတယ်။ ဒါက ဘောလုံးလောကမှာ သဘာဝကျတဲ့ ကိစ္စပါ” လို့ ပြောကြားခဲ့ပါတယ်။
ဂါနာချိုကို အသင်းမှ ဖယ်ရှားလိုက်ခြင်းဟာ အမ်မိုရင်ရဲ့ စည်းလုံးတဲ့ အဝတ်လဲခန်းကိုလိုချင်တဲ့ဆန္ဒကို ထင်ဟပ်စေပါတယ်။ ပေါ်တူဂီနည်းပြဟာ ‘Bomb Squad’ နှင့် ကလပ်တွင် မနေလိုသော ကစားသမားများအကြောင်းကိုလည်း ပြောကြားခဲ့ပါတယ်။
“ဒီမှာ မနေချင်ဘူးဆိုတာ ရှင်းရှင်းလင်းလင်း ပြသနေတဲ့ ကစားသမားတွေ ရှိပါတယ်၊ ဒါကလည်း ပုံမှန်ပါပဲ။ သူတို့ မကောင်းလို့ ကျွန်တော်ကောင်းတာ ဒါမှမဟုတ် ကျွန်တော်မကောင်းလို့ သူတို့ကောင်းတာ မဟုတ်ပါဘူး။ အဲဒီလို အခြေအနေမျိုး မဟုတ်ပါဘူး။ သူတို့က စိန်ခေါ်မှုအသစ်တွေကို လိုချင်တယ်ဆိုတဲ့ ရိုးရှင်းတဲ့ အခြေအနေတစ်ခုပါပဲ။ အပြောင်းအရွှေ့ဈေးကွက် ပိတ်သွားပြီး သူတို့သာ ယူနိုက်တက် ကစားသမားတွေအဖြစ် ရှိနေသေးရင်၊ ကျွန်တော်တို့ ကလပ်အနေနဲ့ သူတို့ကို အတူတူပဲ ဆက်ဆံရမှာပါ”
“ဒါပေမဲ့ ဒီအချိန်မှာတော့ ကျွန်တော်က ဒီမှာ ဆက်နေမယ်လို့ ထင်တဲ့ ကစားသမားတွေနဲ့ပဲ အလုပ်လုပ်နေတာပါ၊ ကျန်တဲ့သူတွေကတော့ သူတို့ရဲ့ ကစားသမားဘဝအတွက် ဖြေရှင်းနည်း ရှာဖို့ ကြိုးစားနေကြပါတယ်” လို့ နည်းပြက ပြောပါတယ်။
ချဲလ်ဆီး၊ အက်စတွန်ဗီလာ၊ အက်သလက်တီကို မက်ဒရစ် နှင့် နာပိုလီ တို့ဟာ ဂါနာချိုနှင့် ချိတ်ဆက်မှုရှိတဲ့ ကလပ်များထဲမှ ပါဝင်နေပါတယ်။ အာဂျင်တီးနားကစားသမားဟာ လာမည့် ရက်သတ္တပတ်များအတွင်း ထွက်ခွာရန် မျှော်လင့်ရပြီး ချဲလ်ဆီးအသင်းကသာ လက်ရှိတွင် သူ့ကို ခေါ်ယူရန် ဦးဆောင်နေပါတယ်။ အကယ်၍ အပြောင်းအရွှေ့ အကောင်အထည်ပေါ်လာပါက အိုးထရက်ဖို့ဒ်တွင် ကောင်းမွန်တဲ့ ကာလတစ်ခုပြီးနောက် အဆုံးသတ်သွားမှာ ဖြစ်ပါတယ်။ လက်ရှိတွင် ဂါနာချိုဟာ အဓိကအသင်းမှ ခွဲထွက်၍ လေ့ကျင့်နေဆဲဖြစ်ပြီး ဆွေးနွေးမှုများ ဆက်လက်လုပ်ဆောင်နေပါတယ်။
Source : www.goal.com
