မန်စီးတီး တို့ အခွင့်အရေးကို အမိအရ ဆုပ်ကိုင်နိုင်ခဲ့ပါပြီ။ စနေနေ့တုန်းက အာဆင်နယ် ရှုံးနိမ့်ခဲ့တဲ့အပေါ် သူတို့ ဘယ်လိုတုံ့ပြန်မလဲဆိုတာ လူတိုင်း စိတ်ဝင်စားနေကြတာပါ။ ဒီမေးခွန်းရဲ့အဖြေကိုတော့ ပက် ဂွါဒီယိုလာ ရဲ့အသင်းက တနင်္ဂနွေနေ့မှာ ချဲလ်ဆီးကို ၃-၀ နဲ့ အပြတ်အသတ် အနိုင်ယူပြီး ပရီးမီးယားလိဂ် ချန်ပီယံလုပွဲကို ပြန်လည် အသက်ဝင်စေခဲ့ပါတယ်။
အာဆင်နယ် က ခြေချော်နေချိန်မှာ မန်စီးတီး က ပိုပြီး အားကောင်းလာပါတယ်။ လက်ကျန်တစ်ပွဲ ကစားဖို့ ရှိသေးတဲ့အပြင် အမှတ်ပေးဇယားထိပ်က အသင်းနဲ့ ၆ မှတ်အကွာကို ရောက်လာတာကြောင့် မြောက်လန်ဒန်က အာဆင်နယ်အတွက် စိုးရိမ်စရာတွေ ဖြစ်လာပါပြီ။
အနောက်လန်ဒန်က မန်စီးတီးရဲ့ အောင်ပွဲခံသံတွေဟာ တကယ့်ကို ကျယ်လောင်ခဲ့ပါတယ်။ ဂွါဒီယိုလာ နဲ့ ကစားသမားတွေတင်မကဘဲ အဝေးကွင်းလာအားပေးတဲ့ ပရိသတ်တွေရဲ့ အောင်ပွဲခံမှုတွေက ဒီနိုင်ပွဲဟာ သူတို့အတွက် ဘယ်လောက် အရေးကြီးလဲဆိုတာ ပြသနေပါတယ်။
အာဆင်နယ် က ဗုဒ္ဓဟူးနေ့မှာ ချန်ပီယံလိဂ်ပွဲ ကစားရဦးမှာဖြစ်ပေမဲ့ မန်စီးတီးကတော့ လာမဲ့ တနင်္ဂနွေနေ့မှာ တွေ့ရမဲ့ မီခေးလ် အာတီတာရဲ့ အသင်းနဲ့ပွဲအတွက် အာရုံအပြည့် ထည့်ထားနိုင်ပါပြီ။ အဲ့ဒီပွဲမှာသာ ထပ်နိုင်ရင် အမှတ်ကွာဟချက်က ပိုကျဉ်းသွားမှာပါ။
မန်စီးတီးဟာ နောက်ဆုံး ၃ ပွဲမှာ အာဆင်နယ်၊ လီဗာပူး နဲ့ ချဲလ်ဆီးတို့ကို ၉ ဂိုးသွင်းပြီး ဂိုးမပေးရဘဲ နိုင်ခဲ့သလို ကာရာဘောင်းဖလားကိုလည်း ရယူနိုင်ခဲ့ပါတယ်။ ဂွါဒီယိုလာ က “ကျွန်တော်တို့ ၃ ပွဲဆက်တိုက် ကောင်းကောင်း ကစားနိုင်ခဲ့ပါတယ်။ ဒါပေမဲ့ အင်္ဂလန်နဲ့ ဥရောပမှာ အကောင်းဆုံးက အာဆင်နယ်ပါပဲ။ သူတို့ရဲ့ တည်ငြိမ်မှုက သက်သေပါပဲ” လို့ ပြောခဲ့ပါတယ်။
စတန်းဖို့ဒ်ဘရစ်ချ်ကွင်းထဲမှာ မန်စီးတီးပရိသတ်တွေက “အာဆင်နယ် ကြည့်နေရဲ့လား” လို့ လှောင်ပြောင် သီချင်းဆိုခဲ့ကြပါတယ်။ စာရင်းဇယားတွေအရ ဧပြီလဟာ ဂွါဒီယိုလာအတွက် အကောင်းဆုံးလဖြစ်ပြီး အာတီတာအတွက်တော့ အဆိုးဆုံးလ ဖြစ်နေပါတယ်။
မန်စီးတီးဟာ အရင်ကလည်း အခုလိုမျိုး အနောက်ကနေ အမီလိုက်ပြီး ချန်ပီယံဆုကို လုယူခဲ့ဖူးပါတယ်။ ၂၀၂၂-၂၃ ရာသီတုန်းက အာဆင်နယ်ဟာ ၂၄၈ ရက်ကြာ ဇယားထိပ်မှာ နေခဲ့ပေမဲ့ နောက်ဆုံးမှာ မန်စီးတီးကပဲ ချန်ပီယံ ဖြစ်သွားခဲ့တာပါ။ အခုလည်း မန်စီးတီးက ၁၉ ပွဲမှာ ၁ ပွဲပဲ ရှုံးနိမ့်ထားပြီး အကောင်းဆုံးပုံစံကို ပြန်ရနေပါပြီ။
လက်ကျန်ပွဲစဉ်တွေမှာ အာဆင်နယ်က ဇယားအောက်ခြေအသင်းတွေနဲ့ ကစားရမှာဖြစ်ပေမဲ့ မန်စီးတီးကတော့ အဲဗာတန်၊ ဘရန့်ဖို့ဒ်နဲ့ အက်စတွန်ဗီလာတို့လို အသင်းခက်ခဲတွေနဲ့ ကစားရဦးမှာပါ။ ဒါပေမဲ့ လာမဲ့အပတ်ပွဲမှာ မန်စီးတီး နိုင်ခဲ့ရင် အခြေအနေတွေက လုံးဝ ပြောင်းလဲသွားနိုင်ပါတယ်။
မန်စီးတီးအသင်းဟာ ဒီနှစ်မှာ လူငယ်ကစားသမားအသစ်တွေ ဖြစ်တဲ့ ဒွန်နာရမ်မာ ၊ မာ့ခ် ဂူဟီ တို့ကို အတွေ့အကြုံရှိတဲ့ ဘာနာဒို ဆေးလ်ဗား၊ ရိုဒရီ တို့နဲ့ ပေါင်းစပ်ပြီး အားကောင်းတဲ့ အသင်းတစ်သင်း ဖြစ်အောင် တည်ဆောက်ထားပါတယ်။ ဟာလန်း က ၂၂ ဂိုးနဲ့ ဂိုးသွင်းအများဆုံး ဖြစ်နေပေမဲ့ နောက်ပိုင်းပွဲတွေမှာ ဂိုးသွင်းတာ နည်းလာပါတယ်။ ဒါပေမဲ့ ဒါက မန်စီးတီးအတွက် ပြဿနာ မဟုတ်ပါဘူး။
ဂွါဒီယိုလာ ကတော့ “ကျွန်တော်တို့က အလေးမပေးခံရတဲ့အသင်း (Underdogs) အဖြစ် ရှိနေရတာကို ပိုကြိုက်ပါတယ်။ ရလဒ်တွေက ယုံကြည်မှုအတွက် ဆေးတစ်ခွက် ဖြစ်ပေမဲ့ ပိုကောင်းအောင် ဘာလုပ်နိုင်မလဲဆိုတာ အမြဲစဉ်းစားရပါမယ်” လို့ ဆိုပါတယ်။ လာမဲ့အပတ်မှာသာ ထပ်နိုင်ရင် မန်စီးတီးရဲ့ ချန်ပီယံလမ်းကြောင်းက ပိုပြီး သေချာသွားမှာပါ။
Source : https://www.bbc.com/
