အေစီမီလန်အသင်းဟာ ဖီယင်နုအသင်းကို နှစ်ကျော့ပေါင်း ၂ ဂိုး-၁ ဂိုးနဲ့ အရေးနိမ့်ကာ ချန်ပီယံလိဂ် ပြိုင်ပွဲကနေ ထွက်ခွာခဲ့ရပြီးနောက် နည်းပြကွန်ဆီကာအိုက အနီကတ်ပြသခံခဲ့ရတဲ့ သီယိုဟာနန်ဒက်ဇ်ကို အပြစ်မတင်ဘဲ သူ့ရဲ့အမှားကြောင့် ထွက်ခွာခဲ့ရတာလို့ ပြောခဲ့ပါတယ်။
ကွန်ဆီကာအိုက “ကျွန်တော်တို့ဟာ ၁၆ သင်းအဆင့်ကို ရောက်ရှိချင်တာကြောင့် ဒါဟာ သေချာပေါက် ကျရှုံးမှုပါ။ ဒီပွဲမှာ ကျွန်တော်တို့ဟာ ပြိုင်ဘက်ထက် ပိုပြီးသန်မာတယ်ဆိုတာကို ပြသခဲ့ပေမဲ့ ကွင်းလယ်ဒိုင်လူကြီးရဲ့ ဆုံးဖြတ်ချက်က ပြင်းထန်တယ်လို့ ပြောရမှာပါ။ ဒီရှုံးနိမ့်မှုအတွက် တာဝန်ရှိတဲ့သူက ကျွန်တော်ပါ၊ သီယိုမဟုတ်ပါ ဘူး။ သီယိုက မီလန်အတွက် အများကြီးပေးခဲ့ပြီး ကျွန်တော်က အမှားအယွင်းတွေ လုပ်ခဲ့ပါတယ်။ ချန်ပီယံလိဂ်ကနေ ထွက်ခွာခဲ့ရတဲ့အတွက် စိတ်ပျက်ပြီး ဒေါသထွက်တယ်”လို့ ပြောခဲ့တာပါ။
အေစီမီလန်အသင်းဟာ ချန်ပီယံလိဂ် ပလေးအော့ဖ် ဒုတိယအကျော့အဖြစ် ဖီယင်နုအသင်းနဲ့ အိမ်ကွင်းမှာ ကစားခဲ့ရာ ၁ ဂိုးစီ သရေကျခဲ့တာ ဖြစ်ပါတယ်။
ဒီပွဲမှာ အေစီမီလန်အသင်းဟာ ပွဲချိန် ၁ မိနစ် မပြည့်ခင်ကတည်းက တိုက်စစ်မှူး ဂျီမီနက်ဇ်ရဲ့သွင်းဂိုးနဲ့ ဖီယင်နု အသင်းကို ဦးဆောင်နိုင်ခဲ့တာပါ။
ဒါပေမဲ့ နောက်ခံလူ သီယိုဟာနန်ဒက်ဇ်ဟာ ဖီယင်နုအသင်း ဂိုးဧရိယာထဲမှာ ဒိုင်ဗင်ထိုးခဲ့တာကြောင့် ပွဲချိန် ၅၁ မိနစ်မှာ နှစ်ဝါတစ်နီနဲ့ ထုတ်ပယ်ခံခဲ့ရပြီး ပွဲရဲ့အလှည့်အပြောင်း ဖြစ်သွားခဲ့ပါတယ်။
ပွဲချိန် ၇၃ မိနစ်မှာ ကာရန်ဇာက ဖီယင်နုအသင်းအတွက် အဖိုးတန် ချေပဂိုးသွင်းယူခဲ့ပြီးနောက် ၁ ဂိုးစီသရေနဲ့ ပွဲပြီးဆုံးခဲ့တာပါ။
ဖီယင်နုအသင်းဟာ ပလေးအော့ဖ် ပထမအကျော့ပွဲစဉ်မှာ အေစီမီလန်အသင်းကို ၁ ဂိုး-ဂိုးမရှိနဲ့ အနိုင်ရရှိထားတာကြောင့် နှစ်ကျော့ပေါင်းရလဒ် ၂ ဂိုး-၁ ဂိုးနဲ့ အနိုင်ရပြီး ၁၆ သင်းအဆင့်ကို တက်နိုင်ခဲ့ပါတယ်။
ဥရောပချန်ပီယံဆုကို ၇ ကြိမ်ရရှိထားတဲ့ အေစီမီလန်အသင်းကတော့ ချန်ပီယံလိဂ် ပြိုင်ပွဲကနေ စောစီးစွာ ထွက်ခွာခဲ့ရပါတယ်။
အေစီမီလန်အသင်းဟာ ချန်ပီယံလိဂ် ပြိုင်ပွဲကနေ ထွက်ခွာခဲ့ရတာကြောင့် စီးရီးအေပြိုင်ပွဲနဲ့ ကိုပါအီတာလီယာ ဖလားပြိုင်ပွဲကိုသာ အာရုံစိုက်ရတော့မှာပါ။
ဒတ်ချ်ကလပ် ဖီယင်နုအသင်းဟာ ၁၆ သင်းအဆင့်မှာ အင်တာမီလန် ဒါမှမဟုတ် အာဆင်နယ်အသင်းနဲ့ တွေ့ဆုံရမှာဖြစ်ပါတယ်။
Source : africa.espn.com
