ပြီးခဲ့တဲ့လက ကစားခဲ့တဲ့ ယူအီးအက်ဖ်အေ နေရှင်းလိဂ်ပြိုင်ပွဲမှာ လက်ရွေးစင်အသင်းကနေ ထွက်ခွာသွားခဲ့ပြီးနောက် စီရော်နယ်ဒို ကို ပေါ်တူဂီဘောလုံးအဖွဲ့ချုပ် က ယူရို ၂၅၅ (ဒေါ်လာ ၂၈၅.၉၀) ဒဏ်ရိုက်ခဲ့သလို ရက် ၃၀ ပွဲပယ်ပြစ်ဒဏ်လည်း ချမှတ်ခဲ့ပါတယ်။
ပေါ်တူဂီ အသင်းဟာ လာမဲ့နိုဝင်ဘာလမှာ ဒိန်းမတ်၊ ဝေးလ် တို့နဲ့ နေရှင်းလိဂ် ပွဲစဉ် ၂ ပွဲ ကစားဖို့ ရှိနေပြီး ရော်နယ်ဒို အနေနဲ့ အဲဒီပွဲစဉ်တွေမှာ ပါဝင်ကစားခွင့် ရရှိတော့မှာပါ။
အသက် ၄၁ နှစ်အရွယ် ကစားသမားဟာ နည်းပြချုပ် ဂျော့ဂျ် ဂျေဆုစ် နဲ့ အငြင်းပွားခဲ့ပြီးနောက် ဒိန်းမတ် နဲ့ ပွဲမတိုင်ခင် အသင်းလူစာရင်းကနေ ထွက်ခွာသွားခဲ့တာ ဖြစ်ပါတယ်။ နော်ဝေ နဲ့ ပွဲမှာ အရန်ခုံမှာပဲထိုင်ခဲ့ရတဲ့ ရော်နယ်ဒို က ဂျေဆုစ် ဟာ ကစားချိန်နဲ့ ပတ်သက်ပြီး ကတိဖျက်ခဲ့တယ်လို့ စွပ်စွဲခဲ့ပါတယ်။
ပြစ်ဒဏ်လျှော့ပေါ့နိုင်တဲ့ အခြေအနေတွေကို ထည့်သွင်းစဉ်းစားပြီးနောက် ချမှတ်နိုင်တဲ့ အမြင့်ဆုံးဒဏ်ငွေပမာဏ ဖြစ်တယ်လို့ အဖွဲ့ချုပ်ကပြောကြားခဲ့ပြီး ရော်နယ်ဒို ရဲ့ ဝန်ခံချက်နဲ့ သန့်ရှင်းတဲ့ စည်းကမ်းပိုင်းဆိုင်ရာမှတ်တမ်းတွေကြောင့် ပြစ်ဒဏ်လျော့ပါးသွားခဲ့တာ ဖြစ်ပါတယ်။
အသင်းလူစာရင်းကနေ ထွက်ခွာပြီးနောက်မှာတော့ ရော်နယ်ဒို က ဂျေဆုစ် ဟာ သူ့အပေါ် “ကတိဖျက်ခဲ့တယ်” လို့ စွပ်စွဲတဲ့ ကြေညာချက်တစ်စောင် ထုတ်ပြန်ခဲ့သလို နည်းပြနဲ့ ဖြစ်ပွားခဲ့တဲ့ အငြင်းပွားမှုကိုလည်း အသေးစိတ် ရှင်းပြခဲ့ပါတယ်။
စခန်းကနေ ထွက်ခွာခဲ့ရတဲ့အထိ ဖြစ်စေခဲ့တဲ့ ဂျေဆုစ် နဲ့ ပြဿနာအပေါ် ရော်နယ်ဒို က “လုံးဝ အံ့အားသင့်စရာ ကောင်းတာကတော့ [နော်ဝေ နဲ့ပွဲမှာ] မိနစ် ၃၀ လောက် ကစားဖို့အဆင်သင့်ဖြစ်ပြီလားလို့ နည်းပြက ကျွန်တော့်ကို မေးခဲ့တာပါပဲ။ ကျွန်တော်ကတော့ ကိုယ်ခန္ဓာကြံ့ခိုင်မှု ပြန်လည်ကောင်းမွန်ရေးကိုပဲ အပြည့်အဝ အာရုံစိုက်ထားခဲ့တာပါ။ ပုံမှန်အတိုင်း အသင်းဖော်တွေနဲ့ အတူတူ လေ့ကျင့်နေခဲ့သလို အဲဒီနေ့မှာ ကစားရမယ်လို့လည်း မထင်ထားခဲ့ပါဘူး။ ဒါပေမဲ့ ဒီအပေါ်မှာ ဘာပြဿနာမှ မရှိခဲ့ပါဘူး” လို့ ပြောခဲ့ပါတယ်။
“ဒီတောင်းဆိုချက်က ကျွန်တော့်ရဲ့ ပြန်လည်ထူထောင်ရေးနဲ့ လေ့ကျင့်ရေး အစီအစဉ်တွေရဲ့ ပြင်ပက ဖြစ်နေခဲ့တာပါ။ ဘာလို့လဲဆိုတော့ ကျွန်တော်က အောက်တိုဘာ ၄ ရက် ဒရာဂို ကွင်းမှာ ကစားမဲ့ပွဲမှာပဲ ပါဝင်ဖို့ ဖြစ်ထားတာမို့လို့ပါ။ ဒါပေမဲ့လည်း ကျွန်တော် လက်ခံခဲ့ပါတယ်။ မိနစ် ၃၀ လောက် ကစားရမှာမို့ အဆင်သင့်ပြင်ထားဖို့ သူက ကျွန်တော့်ကို ပြောခဲ့ပါတယ်။
နောက်ဘာဆက်ဖြစ်လဲဆိုတာ အားလုံးသိကြတဲ့အတိုင်းပါပဲ။ ပထမပိုင်းပြီးကတည်းက ကျွန်တော် သွေးပူလေ့ကျင့်ခန်းတွေ လုပ်ခဲ့ပြီး အချိန်တွေ ကုန်လွန်သွားတာကိုပဲ ထိုင်ကြည့်နေခဲ့ရပေမဲ့ လူစားလဲဖို့ ခေါ်မခံခဲ့ရပါဘူး။
နည်းပြက ကျွန်တော့်အပေါ် ပေးထားတဲ့ ကတိကို ဖျက်ခဲ့တာပါ” လို့ ဆိုပါတယ်။
ပေါ်တူဂီဘောလုံးအဖွဲ့ချုပ် (FPF) က ချမှတ်တဲ့ ဘယ်လိုပြစ်ဒဏ်ကိုမဆို လက်ခံသွားမှာဖြစ်ပြီး လက်ရွေးစင်အသင်းအတွက် ဆက်လက် ကစားပေးချင်နေဆဲ ဖြစ်တယ်လို့ ရော်နယ်ဒို က ပြောခဲ့ပါတယ်။
မန်ချက်စတာ ယူနိုက်တက် နဲ့ ရီးရဲလ် မက်ဒရစ် ကစားသမားဟောင်းကို FPF က ယာယီ ပွဲပယ်ပြစ်ဒဏ် ချမှတ်ထားခဲ့ပြီး တနင်္လာနေ့မှာတော့ တရားဝင်ပြစ်ဒဏ် ချမှတ်ခဲ့တာ ဖြစ်ပါတယ်။
Forbes ရဲ့ ဖော်ပြချက်အရ ရော်နယ်ဒို ဟာ ပြီးခဲ့တဲ့နှစ်အတွင်း ခန့်မှန်းခြေ ဒေါ်လာ သန်း ၃၀၀ အထိ ဝင်ငွေရရှိခဲ့ပြီး ကမ္ဘာ့ဝင်ငွေအကောင်းဆုံး အားကစားသမား ဖြစ်ပါတယ်။
FPF ဥက္ကဋ္ဌ ပတ်ဒရို ပရိုအန်ကာ က ရော်နယ်ဒို ဟာ ပေါ်တူဂီ အတွက် “အဓိက ကစားသမား” ဖြစ်နေဆဲလို့ ယုံကြည်ထားဆဲဖြစ်ကြောင်းနဲ့ အသင်းခေါင်းဆောင်အနေနဲ့ နည်းပြ ဂျေဆုစ် နဲ့ ဖြစ်ပွားခဲ့တဲ့ ပြဿနာကိုဖြေရှင်းပြီး အသင်းလူစာရင်းဆီ ပြန်လာမယ်လို့ ယုံကြည်မှုရှိကြောင်း ပြောကြားခဲ့ပါတယ်။
“ပေါ်တူဂီ ဘောလုံးလောကက မွေးထုတ်ပေးခဲ့တဲ့ အကြီးကျယ်ဆုံးသော ရတနာဖြစ်တဲ့ ကျွန်တော်တို့ရဲ့အသင်းခေါင်းဆောင် စီရော်နယ်ဒို ရဲ့ ဌာနီမှာ ကျွန်တော်တို့ ရှိနေကြတာပါ။
ကျွန်တော်တို့ရဲ့ အသင်းခေါင်းဆောင် စီရော်နယ်ဒို ဟာ ကျွန်တော်တို့အတွက် အရေးအပါဆုံး အစိတ်အပိုင်းတွေထဲက တစ်ခုပါပဲ” လို့ သူက ပြောကြားသွားခဲ့ပါတယ်။
Source : https://www.espn.com.sg/
