မိုက်ကယ် ကာရစ်ခ် ရဲ့ မန်ချက်စတာယူနိုက်တက် ဟာ ချန်ပီယံလိဂ်ပြိုင်ပွဲမှာ ကိုမို အသင်းကို ၄-၁ နဲ့ အရှက်တကွဲ ရှုံးနိမ့်ခဲ့ပြီးနောက် နိုင်ပွဲမရတဲ့ စံချိန်ဆိုးဟာ ၇ ပွဲအထိ ဆက်လက်ရှည်ကြာသွားခဲ့ပါတယ်။
ရာသီအစပိုင်းရလဒ်တွေ ဆိုးရွားနေတဲ့ မန်ချက်စတာယူနိုက်တက် အသင်းနဲ့အတူ နည်းပြ မိုက်ကယ် ကာရစ်ခ် အပေါ် ဖိအားတွေ ပိုမိုကြီးမားလာခဲ့သလို ဗုဒ္ဓဟူးနေ့ညပိုင်းမှာ ကစားအားရော အရည်အသွေးပါပိုကောင်းခဲ့တဲ့ ကိုမို အသင်းရဲ့ အနိုင်ယူတာကို အပြတ်အသတ် ခံခဲ့ရပါတယ်။
ဒီလိုပွဲမျိုးမှာ ကစားအားအပြည့်ထုတ်သုံးဖို့ လိုအပ်ပေမဲ့လည်း မန်ချက်စတာယူနိုက်တက် တို့ဟာ ပြိုင်ဘက်ရဲ့ကစားအားကို မယှဉ်နိုင်ခဲ့ပါဘူး။ ကွင်းလယ်မှာ လှုပ်ရှားမှုမရှိဘဲ တည်ငြိမ်နေတာ၊ ပြိုင်ဘက်ကစားသမားတွေ ပြေးထွက်သွားတာကို လွှတ်ထားတာနဲ့ လူကပ်ဖို့ လွတ်နေတာတွေကြောင့် ဘောလုံးလက်မဲ့ အနေအထားမှာ အသင်းရဲ့ ကြီးမားတဲ့အားနည်းချက်တွေကို မြင်တွေ့ခဲ့ရပါတယ်။
ပွဲစပြီး ၂ မိနစ်မှာတင် မန်ချက်စတာယူနိုက်တက် တို့ ဦးဆောင်ဂိုး စောစောစီးစီး ပေးလိုက်ရပါတယ်။ ချန်ပီယံလိဂ် ၂ ပွဲဆက်တိုက် အစောကြီး ဂိုးပေးခဲ့ရတဲ့ ပထမဆုံးအင်္ဂလန်အသင်းဖြစ်လာခဲ့သလို နည်းပြ ဆပ် ဖာဘရီဂတ်စ် ရဲ့ ကောင်းမွန်စွာ ပြင်ဆင်ထားတဲ့ အသင်းကို ဘယ်လိုမှထိန်းချုပ်နိုင်ခြင်း မရှိခဲ့ပါဘူး။
အိမ်ရှင်အသင်းအတွက်တော့ အာဂျင်တီးနားလက်ရွေးစင်ကြယ်ပွင့် နီကို ပက်ဇ် က ထူးချွန်တဲ့ ခြေစွမ်းကို ပြသသွားခဲ့ပါတယ်။ ဟာရီ မက်ဂွါရီ နေရာလွတ် အများကြီးပေးလိုက်မိတဲ့အမှားကနေ အဖွင့်ဂိုးကို ထောင့်ထဲကန်သွင်းယူခဲ့သလို ကားလို့စ် ဘာလီဘာ ဆီက ဘောလုံးလုယူပြီး တတိယဂိုးကိုပါ ထပ်မံသွင်းယူခဲ့ပါတယ်။
ဒါ့အပြင် နီကို ပက်ဇ် ဟာ ဒုတိယပိုင်းစပြီး ၄ မိနစ်မှာတင် တာဆော့စ် ဒူဗီကတ်စ် ဆီကို ဂိုးဖန်တီးမှု ပြုလုပ်ပေးခဲ့ပြီး အဆိုပါ ကစားသမားက စိတ်ရှုပ်ထွေးနေတဲ့ မက်သစ် ဒီလစ်ဂ် ကို ကျော်ဖြတ်ကာ ဒုတိယဂိုးကို သွင်းယူသွားခဲ့ပါတယ်။
ဒါဟာ ကျောဒဏ်ရာပြဿနာနဲ့ အသင်းရဲ့ ဒဏ်ရာရကစားသမားများပြားမှုကြောင့် မက်သစ် ဒီလစ်ဂ် အတွက် ၃၂၅ ရက်အတွင်း ပထမဆုံးအကြိမ် ပွဲထွက်ကစားခွင့် ရရှိတာ ဖြစ်ပါတယ်။ ဒါပေမဲ့ မိုးသည်းထန်စွာ ရွာသွန်းနေတဲ့ကြားက ဒီလိုပြိုလဲမှုကို လာရောက်ကြည့်ရှုခဲ့ရတဲ့ အဝေးကွင်းအားပေး ပရိသတ်တွေအတွက်တော့ ဆင်ခြေပေးလို့ရမဲ့ အခြေအနေ မဟုတ်ခဲ့ပါဘူး။
အသင်းရဲ့ အဓိကကစားသမား ဖာနန်ဒက်စ် ဟာလည်း အသင်းအတွက် နောက်ဆုံး ၉ ပွဲမှာ ၁ ဂိုးသာ ပါဝင်ပတ်သက်နိုင်ခဲ့ပြီး ဒီပွဲမှာ ပျောက်ကွယ်နေခဲ့ပါတယ်။ သူ ခေါင်းခါပြလိုက်တဲ့ ပုံစံကပဲ အသင်းရဲ့အခြေအနေကို ဖော်ပြနေသလို လူကပ်မခံရတဲ့ ဗဟိုနောက်ခံလူ ဂျာကိုဘို ရာမွန် က ခေါင်းတိုက်ပြီး ကိုမို အတွက် စတုတ္ထဂိုးကို သွင်းယူသွားခဲ့ပါတယ်။
နာကျင်အချိန်ပိုမှာ ဂျိုရှူအာ ဇာ့ခ်ဇီ သွင်းယူခဲ့တဲ့ ချေပဂိုးက အသင်းအတွက် ဖြေသိမ့်စရာ မဖြစ်ခဲ့ပါဘူး။ အုပ်စုအဆင့် ၃ ပွဲကစားပြီးချိန်မှာ ၃ မှတ်သာရရှိထားလို့ နောက်တစ်ဆင့်တက်ဖို့ ခက်ခဲတဲ့တိုက်ပွဲကို ရင်ဆိုင်ရတော့မှာဖြစ်ပြီး ချက်ချင်းဆိုသလိုပဲ တနင်္ဂနွေနေ့ ပရီးမီးယားလိဂ်မှာ ဘုန်းမောက် နဲ့ ကစားရမဲ့ အိမ်ကွင်းပွဲစဉ်မှာ ခြေစွမ်းပိုကောင်းလာဖို့နဲ့ နိုင်ပွဲရရှိဖို့ အပြင်းအထန် လိုအပ်နေပါတယ်။
Source : https://www.skysports.com/
