နယူးကာဆယ်ကို ၃-၁ နဲ့ အနိုင်ယူပြီးနောက် အဲဗာတန်အသင်းဟာ ကာရာဘောင်ဖလား ကွာတားဖိုင်နယ်အဆင့်ဆီ တက်လှမ်းသွားနိုင်ခဲ့ပါပြီ။ ကြာသပတေးနေ့ညက ဟေးလ် ဒစ်ကင်ဆန် အားကစားကွင်းမှာ ကစားခဲ့တဲ့ပွဲမှာ ဂျိမ်းစ် ဂါနာ၊ ဟေဒင် ဟက်ခ်နီနဲ့ တီယာနို ဘယ်ရီတို့က အနိုင်ဂိုးတွေကို သွင်းယူပေးခဲ့ကြတာပါ။ ဒန် ဘန်ကတော့ နယူးကာဆယ်အတွက် ခြေပဂိုးတစ်ဂိုး ပြန်သွင်းပေးခဲ့ပါတယ်။
ဒီတစ်ပတ်အစောပိုင်းတုန်းက လိဂ်တူးကလပ် ဖလိဝုဒ် တောင်းဟာ အာဆင်နယ်ကို မယုံနိုင်စရာ အနိုင်ယူကျော်ဖြတ်ခဲ့တာကြောင့် လာမဲ့ ဒီဇင်ဘာလ ကွာတားဖိုင်နယ်မှာ တော့ဖီတို့ဟာ အဲဒီ ဖလိဝုဒ် တောင်းအသင်းနဲ့ သွားရောက်ရင်ဆိုင်ရမှာ ဖြစ်ပါတယ်။
ဒါဟာ အဲဗာတန်အတွက် ၂၀၁၆ ခုနှစ်နောက်ပိုင်း ဖလားပြိုင်ပွဲ ဆီမီးဖိုင်နယ်အဆင့်ဆီ ပထမဆုံးအကြိမ် ပြန်လည်ရောက်ရှိဖို့ အခွင့်အရေးကောင်းတစ်ခု ဖြစ်လာစေပါတယ်။
ပွဲချိန် ၃၄ မိနစ်မှာတော့ အိမ်ရှင်တို့ အငိုက်ဖမ်းပြီး ဦးဆောင်ဂိုး ရယူသွားခဲ့ပါတယ်။ တိုင်ရစ်ခ် ဂျော့ဂျ်ရဲ့ ဖိအားပေးမှုကြောင့် စည်းဘေးမှာ အမာ ဒယ်ဒစ်ခ်ျ ဘောလုံးဆုံးရှုံးသွားခဲ့ပြီးနောက် ဟက်ခ်နီက ဘောလုံးကို ဂါနာဆီ ပုတ်ထုတ်ပေးလိုက်ကာ ဂါနာက အောက်ထောင့်ဆီ အလှပဆုံး ကန်သွင်းယူခဲ့တာပါ။
ပထမပိုင်းပြီးခါနီးမှာပဲ ဒုတိယဂိုး ထပ်ရခဲ့ပြီး ၂-၀ ဖြစ်သွားခဲ့ပါတယ်။ ဒီတစ်ကြိမ်မှာတော့ ဟက်ခ်နီက ဂိုးသွင်းသူဖြစ်လာခဲ့ပြီး ဘယ်ရီရဲ့ ဖြတ်တင်ဘောကတစ်ဆင့် ပိတ်သွင်းကာ ကလပ်အတွက် သူ့ရဲ့ ပထမဆုံးဂိုးကို ရယူနိုင်ခဲ့ပါတယ်။
အဲဒီနောက် ပွဲချိန် ၆၉ မိနစ်မှာတော့ ဘယ်ရီရဲ့ အလှည့် ရောက်လာခဲ့ပါတယ်။ ကီရန် ဒူးစ်ဘူရီ-ဟောလ်ရဲ့ ဖန်တီးပေးပို့မှုကို အမိအရယူပြီး လှုပ်ရှားပြေးထွက်ကာ အေးအေးဆေးဆေးအဆုံးသတ်ရင်း တန်ပြန်တိုက်စစ်ကနေ တတိယမြောက် ဦးဆောင်ဂိုးကို သွင်းယူပေးခဲ့တာပါ။ နယူးကာဆယ်အတွက် ဘန်က ပွဲပြီးခါနီးမှာ ခေါင်းတိုက်ခြေပဂိုး သွင်းယူပေးခဲ့ပေမဲ့ အချိန်နှောင်းသွားခဲ့ပါပြီ။
Source : https://www.skysports.com/
