ဘိုင်ယန်မြူးနစ်အသင်းရဲ့ ဝါရင့်ဂိုးသမားကြီး မန်နျူရယ်နူအာနဲ့ အသင်းကြားကစာချုပ်ဟာ လာမဲ့နွေရာသီမှာ သက်တမ်းကုန်ဆုံးတော့မှာ ဖြစ်ပါတယ်။ အသက် ၄၀ နား နီးကပ်လာပြီဖြစ်တဲ့ နူအာတစ်ယောက် ဘောလုံးလောကကနေ အနားယူတော့မလား ဒါမှမဟုတ် စာချုပ်သစ်နဲ့ ဆက်သွားမလားဆိုတာက ပရိသတ်တွေကြားမှာ တော်တော်လေး စိတ်ဝင်စားစရာ ဖြစ်နေတာပါ။
ဒီအခြေအနေနဲ့ ပတ်သက်ပြီး ဘိုင်ယန်ရဲ့ အားကစားဒါရိုက်တာ မက်စ်အီဘရယ်လ်က Sport1 နဲ့ အင်တာဗျူးမှာ ပွင့်ပွင့်လင်းလင်း ပြောကြားလာပါတယ်။
အီဘရယ်လ်ရဲ့ အဆိုအရ နူအာရဲ့အနာဂတ်ဟာ ကစားသမားတစ်ဦးတည်းရဲ့ ဆန္ဒအပေါ်မှာတင် မူတည်နေတာ မဟုတ်ပါဘူး။ စာချုပ်သစ် ချုပ်ဆိုနိုင်ဖို့ဆိုရင် နူအာကိုယ်တိုင်က အခုလို ထိပ်တန်းအဆင့် စွမ်းဆောင်ရည်မျိုးကို နောက်ထပ်တစ်နှစ်လောက်အထိ ဆက်ပြီးထိန်းထားနိုင်ဖို့လိုသလို၊ အသင်းဘက်ကလည်း သူ့အပေါ် ယုံကြည်မှုရှိနေဖို့ လိုအပ်တယ်လို့ အလေးပေး ပြောခဲ့ပါတယ်။
“သူဟာ အသက် ၄၀ နီးပါး ရှိနေပေမဲ့ ဥရောပရဲ့ ထိပ်တန်းဂိုးသမားတစ်ဦးအဖြစ် ရှိနေဆဲပါ၊ ဒါပေမဲ့ ဒီအခြေအနေကို ဆက်ထိန်းထားနိုင်ဖို့နဲ့ သူ့ရဲ့ စိတ်အားထက်သန်မှုတွေအကြောင်းကိုလည်း ထည့်သွင်းစဉ်းစားရဦးမယ်” လို့ အီဘရယ်လ်က ဆိုပါတယ်။
လတ်တလောမှာတော့ နူအာဟာ ကြွက်သားဒဏ်ရာကြောင့် အနားယူနေရပေမဲ့ အသင်းဘက်ကတော့ အလောတကြီး ဆုံးဖြတ်ချက်ချမှာ မဟုတ်ပါဘူး။ လက်ရှိမှာ အရန်ဂိုးသမား ဂျိုးနတ်စ်အာဘစ်၊ အတွေ့အကြုံရင့် ဆဗန်အူရိုက်နဲ့ အငှားသွားကစားနေတဲ့ နူဘယ်လ်တို့ ရှိနေတဲ့အတွက် ဂိုးသမားနေရာက စိတ်ချရတဲ့ အနေအထားမှာ ရှိနေလို့ပါ။ ဒါကြောင့် နူအာလို ဂန္ထဝင်ကစားသမားမျိုးနဲ့ အေးအေးဆေးဆေး ဆွေးနွေးပြီးမှသာ အကောင်းဆုံး အဖြေတစ်ခု ထုတ်ပြန်သွားမယ်လို့ သိရပါတယ်။
Source : https://www.goal.com/
