အာဆင်နယ်အသင်းဟာ ချယ်လ်ဆီးနဲ့ပွဲမှာ အကောင်းဆုံးခြေစွမ်းမျိုး မပြသနိုင်ခဲ့ပေမဲ့ ထောင့်ကန်ဘောကနေရရှိတဲ့ ဂိုး ၂ ဂိုးနဲ့ ၂-၁ ဂိုးဖြင့် အနိုင်ရရှိခဲ့ပြီး ပရီးမီးယားလိဂ်ဇယားထိပ်မှာ ၅ မှတ်အသာနဲ့ ဆက်လက်ဦးဆောင်နိုင်ခဲ့ပါတယ်။
ဒီပွဲမှာ ထူးခြားချက်ကတော့ အာဆင်နယ်ဟာ ဒီရာသီမှာ ထောင့်ကန်ဘောကနေ ၁၆ ဂိုးအထိ သွင်းယူနိုင်ခဲ့ပြီး ဒါဟာ ပရီးမီးယားလိဂ်သမိုင်းတစ်လျှောက် တစ်ရာသီအတွင်း ထောင့်ကန်ဘောကနေ အများဆုံးသွင်းတဲ့စံချိန်ကို လိုက်မီသွားတာပဲ ဖြစ်ပါတယ်။ ဂါဘရီယယ်ရဲ့ ခေါင်းတိုက်ချက်ကနေတစ်ဆင့် ဝီလျံ ဆာလီဘာက ပထမဂိုးသွင်းခဲ့ပြီး ယူရီယန် တင်းဘားက ဒုတိယဂိုးကို သွင်းယူပေးခဲ့တာပါ။
ဒီလို ပြစ်ဒဏ်ဘော (Set-pieces) တွေကိုပဲ အဓိကအားကိုးပြီး နိုင်ပွဲရှာနေတာနဲ့ ပတ်သက်လို့ ဝေဖန်မှုတွေလည်း ထွက်ပေါ်နေပါတယ်။ ခရစ် ဆတ်တန်နဲ့ ပက်ထရစ် ဗီအေရာတို့က အာဆင်နယ်အနေနဲ့ အခုထက်ပိုတဲ့ ကစားဟန်မျိုး ပြသသင့်ကြောင်းနဲ့ သူတို့သာ ချန်ပီယံဖြစ်ခဲ့ရင် သမိုင်းမှာ အလှပဆုံးမဟုတ်တဲ့ ချန်ပီယံအသင်း ဖြစ်လာနိုင်ကြောင်း ထောက်ပြခဲ့ကြပါတယ်။ ဒါပေမဲ့ နည်းပြ အာတီတာကတော့ ဒါဟာ ရုပ်ဆိုးတဲ့ကစားဟန်မဟုတ်ဘဲ ပွဲအခြေအနေအပေါ် မူတည်ပြီး အနိုင်ရအောင် ကစားတာသာဖြစ်ကြောင်း၊ မိမိအတွက်တော့ ဒါဟာ လှပတဲ့ပွဲတစ်ပွဲဖြစ်ကြောင်း တုံ့ပြန်ခဲ့ပါတယ်။
အာဆင်နယ်ရဲ့ ဒီအောင်မြင်မှုနောက်ကွယ်မှာ ဘရန့်ဖို့ဒ်ကနေ ခေါ်ယူခဲ့တဲ့ ပြစ်ဒဏ်ဘောနည်းပြ နီကိုးလပ်စ် ဂျိုဗာရဲ့ အခန်းကဏ္ဍက အရေးပါနေသလို ခံစစ်မှူး ဂါဘရီယယ်ဟာလည်း အသင်းရဲ့ ပြစ်ဒဏ်ဘောကစားကွက်တွေမှာ အဓိကကျတဲ့သူ ဖြစ်ပါတယ်။ သူတို့ဟာ ဂိုးတိုင်အဝေးဘက်မှာ စုနေပြီးမှ ဘောလုံးလာတဲ့အချိန်မှာ ပြိုင်တူပြေးဝင်တဲ့ ကစားကွက်ကို အသုံးပြုလေ့ရှိပြီး ဒါဟာ ပြိုင်ဘက်တွေအတွက် တားဆီးရခက်ခဲတဲ့ ဗျူဟာတစ်ခု ဖြစ်နေပါတယ်။
လက်ရှိမှာ အာဆင်နယ်ဟာ ပရီးမီးယားလိဂ်အပြင် ချန်ပီယံလိဂ်၊ ကာရာဘောင်းဖလားနဲ့ အက်ဖ်အေဖလားတို့မှာလည်း လမ်းကြောင်းမှန်ပေါ် ရောက်ရှိနေပါတယ်။ အဓိက တိုက်စစ်မှူး ဗစ်တာ ယောကရက်စ်ကလည်း ၁၀ ဂိုးအထိ သွင်းယူထားနိုင်ပြီ ဖြစ်ပါတယ်။ ဝေဖန်သူ လီယွန် အော့စမန် ပြောသလိုပဲ အာဆင်နယ်အနေနဲ့ သူတို့ရဲ့ အားသာချက်ဖြစ်တဲ့ ပြစ်ဒဏ်ဘောတွေကို ထိရောက်စွာ အသုံးချနေတာဖြစ်ပြီး အဆုံးသတ်မှာတော့ လှပတဲ့ကစားကွက်ထက် ဂိုးဧရိယာအတွင်း ထိရောက်မှုရှိပြီး ၃ မှတ်ရရှိဖို့ကသာ ချန်ပီယံဆုအတွက် အရေးကြီးဆုံး ဖြစ်နေပါတယ်။
Source : https://www.bbc.com/
