လီဗာပူးဂန္ထဝင် စတီဗင် ဂျရတ်က အင်္ဂါနေ့ညက ဝုလ်ဗ်နဲ့ပွဲမှာ အသင်းရဲ့ ခြေစွမ်းဟာ “တော်တော်လေး ဆိုးရွားတယ်” လို့ ပြင်းပြင်းထန်ထန် ဝေဖန်လိုက်ပြီး နည်းပြ အာနယ် ဆလော့အနေနဲ့ ရီယို ငူမိုဟာကို ပွဲထွက်ခွင့်ပေးဖို့ တိုက်တွန်းလိုက်ပါတယ်။
မိုလီနူးကွင်းမှာ ၂-၁ နဲ့ မမျှော်လင့်ဘဲ ရှုံးနိမ့်ခဲ့တဲ့ပွဲမှာ အသက် ၁၇ နှစ်အရွယ် လူငယ်ကစားသမားလေးဟာ လူစားဝင်ကစားချိန်အတွင်း ကိုဒီ ဂက်ပိုထက် ပိုခြေစွမ်းပြနိုင်ခဲ့တာကို ဂျရတ်က သတိထားမိခဲ့တာပါ။ အခုလို တိုက်စစ်ပိုင်း အားနည်းနေတဲ့ လီဗာပူးအသင်းအနေနဲ့ ဒီလူငယ်ကြယ်ပွင့်လေးကို အသုံးချဖို့ လိုအပ်နေပြီလို့ သူက အခိုင်အမာ ပြောကြားခဲ့ပါတယ်။
ဂျရတ် အဓိက စိတ်ပျက်ခဲ့တာက တိုက်စစ်ပိုင်းမှာ ဂိုးရဖို့ ရုန်းကန်နေရတာဖြစ်ပြီး ငူမိုဟာကို ထည့်သွင်းဖို့ အကြံပြုခဲ့ပါတယ်။ ပေါင် ၄၄ သန်းတန် ဂက်ပိုက ခြေစွမ်းမပြနိုင်ခဲ့ပေမဲ့ ဒီလူငယ်လေးကတော့ ခဏလေးအတွင်းမှာပဲ အကျိုးသက်ရောက်မှု ရှိစေခဲ့ပါတယ်။
“ပွဲချိန် ၆၅ မိနစ်အထိ လီဗာပူးဟာ တော်တော်လေးကို ညံ့ဖျင်းခဲ့တယ်” လို့ သူက TNT Sports မှာ ပြောခဲ့ပါတယ်။ “သူတို့တွေ ကစားကွက် အရှိန်လည်းမရှိသလို အရည်အသွေးလည်း မရှိခဲ့ဘူး။ ငူမိုဟာက ဂက်ပို ၆၅ မိနစ်လောက် ကစားတာထက်စာရင် ခဏလေးအတွင်းမှာ ပိုလုပ်ပြနိုင်ခဲ့တယ်။ ဒါကြောင့် သူဟာ ပွဲထွက်ခွင့်နဲ့ ထိုက်တန်ပါတယ်။ ဆလော့အနေနဲ့ သောကြာနေ့ညပွဲမှာ ဒီကလေးကို ပွဲထုတ်သင့်တယ်” လို့ ဂျရတ်က ဆိုပါတယ်။
တိုက်စစ်ပိုင်းတင်မကဘဲ တန်းဆင်းဇုန်က အသင်းကို ခံစစ်က ပျော့ပျောင်းနေတာကိုလည်း ဂျရတ်က ဝေဖန်ခဲ့ပါတယ်။ အီဘရာဟီမာ ကိုနတေးနဲ့ ဗာဂျေး ဗန်ဒိုက်တို့ရဲ့ အခြေခံ ခံစစ်ပိုင်း အမှားတွေအပြင် ဂိုးသမား အလစ်ဆန် ဘက်ကာရဲ့ အမှားကနေ ဒုတိယဂိုး ပေးလိုက်ရတဲ့အပေါ်မှာလည်း သူက စိတ်ပျက်နေပါတယ်။
“ဝုလ်ဗ်က လီဗာပူးကို ကောင်းကောင်း ထိန်းချုပ်နိုင်ခဲ့တယ်။ ပထမဂိုးဆိုရင် ရိုးရိုးလေး ကန်တင်ပေးတာကို လူချင်းမကပ်နိုင်ဘဲ ပေးလိုက်ရတာ။ ဒုတိယဂိုးကတော့ ဂိုးသမား အမှားဖြစ်ပြီး ဘယ်သူမှလည်း ပြန်မတုံ့ပြန်နိုင်ခဲ့ဘူး။ FA ဖလားမှာ ရှေ့ဆက်ချင်ရင် ခံစစ်ကို ဒီထက်ပိုပြီး ကောင်းအောင်ကစားရမယ်” လို့ သူက မှတ်ချက်ပေးခဲ့ပါတယ်။
အသင်းတွင်းမှာလည်း ရှုံးနိမ့်မှုကြောင့် စိတ်မကောင်းဖြစ်နေကြပါတယ်။ နည်းပြ ဆလော့က ဒါဟာ ဒီရာသီရဲ့ နောက်ထပ် အဟန့်အတားတစ်ခုလို့ ပြောခဲ့ပြီး ဗန်ဒိုက်ကလည်း အသင်းရဲ့ အမှားတွေကို ပွင့်ပွင့်လင်းလင်း ဝန်ခံခဲ့ပါတယ်။
“ကစားတာက နှေးကွေးပြီး ခန့်မှန်းရ လွယ်နေပါတယ်။ ဘောလုံး ပေးပို့တာတွေကလည်း ပေါ့ဆသလို ဆုံးဖြတ်ချက်ချတာတွေလည်း မှားယွင်းခဲ့တယ်” လို့ ဗန်ဒိုက်က ဆိုပါတယ်။ အခုဆိုရင် လီဗာပူးဟာ ချယ်လ်ဆီးကသာ အက်စတွန်ဗီလာကို နိုင်ခဲ့ရင် ဂိုးကွာခြားချက်နဲ့ အဆင့် ၅ နေရာကို ဆင်းပေးရတော့မဲ့ အခြေအနေမှာ ရှိနေပါတယ်။
Source : https://www.goal.com/
