မန်ချက်စတာစီးတီး အသင်းဟာ ပရီးမီးယားလိဂ် ရဲ့ ဘဏ္ဍာရေးစည်းမျဉ်း (FFP) တွေကိုချိုးဖောက်ပြီး ပြိုင်ပွဲတစ်ခုလုံးကို ဆိုးဆိုးရွားရွား ထိခိုက်စေခဲ့တာကြောင့် သူတို့အနေနဲ့ ဘယ်လိုပြစ်ဒဏ်မျိုး ခံယူသင့်လဲဆိုတာ ဆုံးဖြတ်ရအရမ်းခက်ခဲတယ်လို့ အမေရိကန် အသင်းနည်းပြ ပိုချက်တီနို က တနင်္လာနေ့မှာ ပြောကြားလိုက်ပါတယ်။
ဆောက်သမ်တန်၊ တော့တင်ဟမ် ဟော့စပါး နဲ့ ချယ်လ်ဆီး အသင်းတွေမှာ ၇ ရာသီကြာ နည်းပြအဖြစ် တာဝန်ယူခဲ့ဖူးတဲ့ ပိုချက်တီနို က “အားကစားဆိုင်ရာ တရားမျှတမှုမရှိခဲ့တဲ့ ကာလတစ်ခုကို ကျွန်တော်တို့ ဖြတ်သန်းခဲ့ရတယ်” လို့ ဖွင့်ဟခဲ့ပါတယ်။
ပြီးခဲ့တဲ့အပတ်က ထွက်ပေါ်လာတဲ့သတင်းအရ မန်ချက်စတာစီးတီး ဟာ ၂၀၀၉ ကနေ ၂၀၁၈ ခုနှစ်အတွင်း ပရီးမီးယားလိဂ် ဘဏ္ဍာရေးစည်းမျဉ်း ချိုးဖောက်မှု စွဲချက်ပေါင်း ၁၁၅ ချက်ထဲက ၁၁၄ ချက်မှာ ပြစ်မှုထင်ရှား တွေ့ရှိခဲ့ရတယ်လို့ သိရပါတယ်။
အဲဒီကာလအတွင်း မန်စီးတီး ဟာ ပရီးမီးယားလိဂ် ဖလား ၃ ကြိမ်၊ အက်ဖ်အေဖလား ၁ ကြိမ်နဲ့ လိဂ်ဖလား ၃ ကြိမ် ရယူနိုင်ခဲ့ပါတယ်။ အဲဒီလိဂ်ဖလားတွေထဲက တစ်ခုဖြစ်တဲ့ ၂၀၁၇-၁၈ ရာသီတုန်းက ပိုချက်တီနို ကိုင်တွယ်ခဲ့တဲ့ စပါး အသင်းဟာ အဆင့် ၃ နေရာနဲ့ အဆုံးသတ်ခဲ့ရတာပါ။ အဲဒီမတိုင်ခင် ရာသီမှာလည်း စပါး ဟာ ဘဏ္ဍာရေးစည်းမျဉ်း ချိုးဖောက်ခဲ့ဖူးတဲ့ ချယ်လ်ဆီး ရဲ့ နောက် ဒုတိယနေရာမှာပဲ ရပ်တည်နိုင်ခဲ့ပါတယ်။
အင်္ဂါနေ့မှာ ကစားမဲ့ ချီလီ နဲ့ ခြေစမ်းပွဲမတိုင်ခင်မှာ ပိုချက်တီနို က မန်ချက်စတာစီးတီး ရဲ့ စွဲချက်တွေနဲ့ ပတ်သက်ပြီး သင့်တင့်မျှတတဲ့ ပြစ်ဒဏ်က ဘာဖြစ်မလဲဆိုတာ မေးမြန်းခံခဲ့ရပါတယ်။
“စွဲချက် ၁၁၅ ချက်မှာ ၁၁၄ ချက်ထိ အပြစ်ရှိတယ်လို့ သတ်မှတ်ခံရတဲ့အခါ မျှတတဲ့ပြစ်ဒဏ်က ဘာဖြစ်သင့်လဲဆိုတာ ဆုံးဖြတ်ဖို့ သိပ်ခက်ပါတယ်။ နော်တင်ဟမ်ဖောရက်စ် ဒါမှမဟုတ် အဲဗာတန် လို ကလပ်တွေကျတော့ အမှတ်လျှော့တာ ဒါမှမဟုတ် ဒဏ်ငွေတပ်တာမျိုးတွေ ခံခဲ့ရတယ်။
အခုကိစ္စက အံ့ဩတုန်လှုပ်စရာကောင်းလောက်အောင်ပြင်းထန်ပြီး အခြေအနေက အရမ်းခက်ခဲပါတယ်။ ဒီလို စည်းမျဉ်းတွေ အကြီးအကျယ် ချိုးဖောက်ခံရချိန်မှာ ထိန်းချုပ်မှုတွေက ဘယ်ရောက်နေလဲဆိုတာ မေးခွန်းထုတ်စရာ ဖြစ်လာတာက ကျွန်တော့်ကို အာရုံစိုက်မိစေဆုံး အချက်ပါပဲ” လို့ ၎င်းက ရှင်းပြခဲ့ပါတယ်။
သူ စပါး အသင်းကို ကိုင်တွယ်ခဲ့စဉ်က အသင်းကွင်းသစ် တည်ဆောက်နေရတာကြောင့် ကစားသမားသစ် မခေါ်ယူနိုင်ခဲ့တဲ့ အခြေအနေကိုလည်း ပိုချက်တီနို က ပြန်ပြောင်းပြောပြခဲ့ပါတယ်။ စပါး ဟာ ပရီးမီးယားလိဂ် သမိုင်းမှာ ၁၈ လကြာ ကစားသမားသစ် မခေါ်ယူနိုင်ခဲ့တဲ့ တစ်ခုတည်းသော အသင်းဖြစ်မယ်လို့ သူကထင်မြင်နေပါတယ်။
“ဒါက ကျွန်တော်တို့အတွက် ကြီးမားတဲ့အားနည်းချက် ဖြစ်စေခဲ့ပါတယ်။ အဲဒီအချိန်က ကျွန်တော်တို့ဟာ အကောင်းဆုံး အသင်းတွေနဲ့ အပြိုင်တိုက်ပွဲဝင်ခဲ့ရသလို ၂၀၁၉ မှာ ချန်ပီယံလိဂ် ဗိုလ်လုပွဲအထိ တက်လှမ်းနိုင်ခဲ့တာပါ။ ဘာကြောင့် အဲဒီထိန်းချုပ်မှုတွေက ကျွန်တော်တို့အပေါ်မှာကျတော့ တင်းကျပ်ပြီး တခြားသူတွေအပေါ်မှာ လျော့ရဲနေခဲ့ရတာလဲ။
အဲဒါကြောင့် ဒါတွေအားလုံးက အရမ်းထူးဆန်းနေတယ်လို့ ကျွန်တော်ပြောတာပါ။ တကယ်လို့သာ သူတို့ စည်းမျဉ်း ၁၁၄ ချက် ချိုးဖောက်ခဲ့တာ အမှန်ဆိုရင် ကျွန်တော်တို့ လှည့်စားခံခဲ့ရတဲ့ ကာလတစ်ခုကို ဖြတ်သန်းခဲ့ရတာပဲ ဖြစ်ပါတယ်။ ဖြစ်ပျက်ခဲ့တဲ့ ကိစ္စတွေကို ဘယ်လိုပြစ်ဒဏ်ကမှ ပြန်လည်မကုစားပေးနိုင်သလို ပရီးမီးယားလိဂ် ရဲ့ ထိန်းချုပ်ရေးစနစ်တွေလည်း အကြီးအကျယ် ပျက်စီးသွားခဲ့ပါပြီ” လို့ သူက ထောက်ပြခဲ့ပါတယ်။
အဲဒီကာလအတွင်း မန်စီးတီး ရဲ့ အောင်မြင်မှုတွေထဲမှာ ၂၀၁၁-၁၂ ရာသီ နောက်ဆုံးပွဲစဉ်မှာ ဆာဂျီယို အဂွဲရိုး က ကျူပီအာ အသင်းဘက်ကို နာကျင်အချိန်ပိုမှာ သွင်းယူပေးခဲ့တဲ့ သမိုင်းဝင်ဂိုးနဲ့ ၁၉၆၈ ခုနှစ်နောက်ပိုင်း ပထမဆုံး အမှတ်ပေးဖလား ဆွတ်ခူးနိုင်ခဲ့တဲ့ အခိုက်အတန့်တွေ ပါဝင်နေပါတယ်။ အခုအခါမှာတော့ အဲဒီသမိုင်းဝင် အခိုက်အတန့်တွေရဲ့ စစ်မှန်မှုအပေါ် သံသယတွေ ဝင်လာခဲ့ရပါပြီ။
“ရရှိခဲ့ပြီး အောင်ပွဲခံခဲ့တဲ့အရာတွေက တကယ်မဟုတ်ခဲ့ဘူးဆိုရင် ဒါဟာ တကယ့်ကို ဝမ်းနည်းစရာ ကောင်းတဲ့ အခြေအနေပါ။ ကျွန်တော်တို့ အားကစားဆိုင်ရာ တရားမျှတမှု မရှိတဲ့ ကာလတစ်ခုကို ဖြတ်သန်းခဲ့ရပါတယ်။ ဒီစွဲချက်တွေသာ အတည်ဖြစ်သွားရင် ဖြစ်ပျက်ခဲ့တာတွေကို ပြန်ကုစားဖို့ အရမ်းခက်ပါလိမ့်မယ်။
အနည်းဆုံးတော့ အနာဂတ်မှာ တန်းတူညီမျှမှုရှိလာဖို့ သင်ခန်းစာ ရသွားစေချင်ပါတယ်။ စပါး မှာ ရှိတုန်းက ချယ်လ်ဆီး နဲ့ ချန်ပီယံဆုအတွက် အပြိုင်လုခဲ့ရချိန်တုန်းကလည်း ကျွန်တော် ပြောခဲ့ဖူးပါတယ်။ သူတို့က အမှတ်ပိုရခဲ့လို့ ပိုကောင်းခဲ့တာမှန်ပေမဲ့ စည်းမျဉ်းတွေကို ချိုးဖောက်ပြီးမှ ရခဲ့တာပါ။ အဲဒါကို ခင်ဗျားတို့ ဘယ်လို ပြန်ကုစားမလဲ” လို့ ပိုချက်တီနို က မေးခွန်းထုတ်သွားပါတယ်။
အမေရိကန် အသင်းဟာ အင်္ဂါနေ့မှာ ကစားမဲ့ ချီလီ နဲ့ ခြေစမ်းပွဲအပြီး စက်တင်ဘာ/အောက်တိုဘာ နိုင်ငံတကာ ရက်သတ္တပတ်အတွင်းမှာ မက္ကဆီကို၊ ကနေဒါ တို့နဲ့ နောက်ထပ် ၂ ပွဲ ဆက်လက်ယှဉ်ပြိုင်သွားမှာ ဖြစ်ပါတယ်။
Source : https://www.espn.com.sg/
