ဖီလာဒဲလ်ဖီးယား ကွင်းကြီးအတွင်းမှာတော့ ဘရာဇီးလ်အသင်းရဲ့ တောက်ပခဲ့တဲ့ အတိတ်ကာလတွေကို ပြန်လည်အမှတ်ရစရာတွေ ပြည့်နှက်နေခဲ့ပါတယ်။ ၂၀၀၂ ခုနှစ် ကမ္ဘာ့ဖလားချန်ပီယံအသင်းမှာ ပါဝင်ခဲ့တဲ့ ရော်နယ်ဒင်ညိုဟာ ပွဲကြည့်စင်ပေါ်မှာ ရှိနေခဲ့သလို၊ ဟေတီကို ၃-၀ နဲ့ အနိုင်ရရှိခဲ့တဲ့ပွဲစဉ်အတွင်း ပရိသတ်တွေကလည်း ကမ္ဘာ့ဖလားတုတွေကို လေထဲမှာ ဝှေ့ယမ်းပြီး အားပေးခဲ့ကြပါတယ်။
ကမ္ဘာ့ဖလားအဖွင့်ပွဲစဉ်အဖြစ် မော်ရိုကို အသင်းနဲ့ ကစားခဲ့တဲ့ပွဲမှာ ဘရာဇီးလ် အသင်းရဲ့ စွမ်းဆောင်ရည်ကတော့ အားလုံးမျှော်လင့်ထားသလို ဖြစ်ပျက်ခဲ့ပါတယ်။ လွန်ခဲ့တဲ့ တစ်နှစ်က နည်းပြ ကာလို အန်ဆလော့တီ ကို ခန့်အပ်ပြီးကတည်းက ပုံမှန်ခြေစွမ်းမရှိဘဲ ဖြစ်နေခဲ့တဲ့ ဘရာဇီးလ် အသင်းဟာ နယူးဂျာစီမှာ ကစားခဲ့တဲ့ပွဲမှာလည်း စုစည်းမှုမရှိတဲ့ ကစားဟန်ကြောင့် နောက်ဆုံးမှာတော့ ဗီနီဆီးယပ်စ် ဂျူနီယာ ရဲ့ တစ်ကိုယ်တော်မှော်ဆန်တဲ့ သွင်းဂိုးနဲ့တင် သရေတစ်မှတ်ကို ခက်ခက်ခဲခဲ လုယူခဲ့ရပါတယ်။ ရှေ့ဆက်ဖို့အတွက် အီတလီလူမျိုး နည်းပြကြီးမှာ စဉ်းစားစရာတွေ အများကြီး ရှိလာခဲ့ပါပြီ။
ငါးကြိမ်တိုင်တိုင် ကမ္ဘာ့ဖလားဆုကို ဆွတ်ခူးထားတဲ့ ဘရာဇီးလ်အသင်းဟာ အကောင်းဆုံးအသင်းတွေနဲ့ ယှဉ်ပြိုင်ကစားနိုင်တဲ့ အရည်အချင်းရှိပြီး ၂၄ နှစ်ကြာ စောင့်ဆိုင်းခဲ့ရတဲ့ ကမ္ဘာ့ဖလားချန်ပီယံအိမ်မက်ကို အဆုံးသတ်ဖို့ ရည်မှန်းထားတယ်လို့ နည်းပြ ဖြစ်သူ ကာလို အန်ဆလော့တီက သောကြာနေ့မှာ ပြောကြားလိုက်ပါတယ်။
ဘရာဇီးလ် ဂန္ထဝင်ကစားသမား ကာဖူး က ပြီးခဲ့တဲ့ဆယ်စုနှစ်အတွင်း အမျိုးသားအသင်းမှာ နေမာ ဟာ တာဝန်တွေကို အလွန်အကျွံ ထမ်းပိုးခဲ့ရပြီး ဒါက နိုင်ငံရဲ့ ဆဋ္ဌမမြောက် ကမ္ဘာ့ဖလားချန်ပီယံဆု ဆွတ်ခူးနိုင်မဲ့ မျှော်လင့်ချက်ကို ထိခိုက်ပျက်စီးစေခဲ့တယ်လို့ ယုံကြည်နေပါတယ်။
