ရီးရဲလ်မက်ဒရစ် အသင်းဟာ အီတလီ စီရီးအေ မှာ အထူးခြေစွမ်းပြသနေတဲ့ ကွင်းလယ်လူ နီကိုပက်ဇ် ကို စန်တီယာဂို ဘာနေဗျူး ကွင်းဆီ ပြန်လည်ခေါ်ယူဖို့အတွက် အစီအစဉ်တွေကို အရှိန်မြှင့် လုပ်ဆောင်နေပါပြီ။
ဒီအကယ်ဒမီထွက် ကစားသမားလေးဟာ အီတလီကလပ် ကိုမို အသင်းနဲ့အတူ ပြီးခဲ့တဲ့ ရာသီနှစ်ခုကို ဖြတ်သန်းခဲ့ပြီးနောက် မက်ဒရစ် ကို ပြန်လာဖို့ရှိနေတာဖြစ်ပြီး အသင်းဘက်ကလည်း စာချုပ်ထဲမှာပါဝင်တဲ့ ပြန်လည်ဝယ်ယူခွင့်အပိုဒ်ကို အသက်သွင်းဖို့ ပြင်ဆင်နေပါတယ်။ ရီးရဲလ်မက်ဒရစ် အနေနဲ့ ဒီအပြောင်းအရွှေ့ကိုအပြီးသတ်ဖို့ အခုလာမဲ့ တနင်္လာနေ့ကစပြီး နှစ်ပတ်တာ အချိန်ပြတင်းပေါက် ရရှိထားတယ်လို့ သိရပါတယ်။
အသင်းရဲ့ ရေရှည်အားကစား စီမံကိန်းတွေ၊ ဥက္ကဋ္ဌ ရွေးကောက်ပွဲတွေနဲ့ ဆက်စပ်နေတဲ့ အခြားအရေးကြီး ဆုံးဖြတ်ချက်တွေနဲ့ မတူဘဲ နီကိုပက်ဇ် ကို ပြန်ခေါ်မဲ့ကိစ္စကတော့ အသင်းတွင်းမှာ အားလုံးသဘောတူညီမှု ရရှိထားပြီးသား ဖြစ်ပါတယ်။ ကလပ်အသင်းအတွင်းမှာ သူ့ကို ပြန်ခေါ်ဖို့ တခဲနက်ထောက်ခံနေကြသလို ဥက္ကဋ္ဌ ဖလော်ရင်တီးနိုး ပီရက်ဇ် အနေနဲ့လည်း ရွေးကောက်ပွဲ လုပ်ငန်းစဉ်တွေ ပြီးဆုံးတာကို စောင့်နေစရာမလိုဘဲ ဒီအပြောင်းအရွှေ့ကို အတည်ပြုပေးနိုင်တဲ့ အနေအထားမှာ ရှိနေပါတယ်။
မက်ဒရစ် ဘက်က ကြည့်မယ်ဆိုရင်တော့ ဒီအပြောင်းအရွှေ့ဟာ ဈေးကွက်ထဲက တကယ့်အခွင့်အရေးကောင်း တစ်ခုပါပဲ။ နီကိုပက်ဇ် ကို ပြန်လည်ခေါ်ယူဖို့အတွက် ယူရို ၉ သန်းဝန်းကျင်ပဲ ကုန်ကျမှာဖြစ်ပြီး ဥရောပတခွင်မှာ သူ့ကို စိတ်ဝင်စားမှု မြင့်တက်နေတာနဲ့ ယှဉ်ရင် ဒီပမာဏက တကယ့်ကို အမြတ်အစွန်းများတဲ့ ဈေးနှုန်းလို့ မြင်နေကြပါတယ်။ အီတလီကလာတဲ့ သတင်းတွေအရဆိုရင် ဒီရာသီမှာ သူခြေစွမ်းပြနေတာကြောင့် အင်တာမီလန် အသင်းက ယူရို သန်း ၆၀ နီးပါးအထိ ပေးပြီး ကမ်းလှမ်းဖို့ စိတ်ဝင်စားနေတယ်လို့တောင် သိရပါတယ်။
နီကိုပက်ဇ် ဟာ သူ့ရဲ့ အနာဂတ်နဲ့ပတ်သက်ပြီး အပြီးသတ်မဆုံးဖြတ်ခင် ကိုမို အသင်း ချန်ပီယံလိဂ် ဝင်ခွင့် ရ၊ မရ ဆိုတာကို စောင့်ကြည့်ချင်ခဲ့တာ ဖြစ်ပါတယ်။ ဒါပေမဲ့ ရလဒ် ဘယ်လိုပဲဖြစ်ဖြစ် အခုအချိန်မှာတော့ သူ့ရဲ့လမ်းကြောင်းက ဘာနေဗျူး ဆီကိုပဲ ပြန်ဦးတည်နေပြီ ဖြစ်ပါတယ်။
ဒီအာဂျင်တီးနား ကွင်းလယ်လူဟာ လာမဲ့ရာသီ ရီးရဲလ်မက်ဒရစ် ရဲ့ စီမံကိန်းတွေမှာ ပထမဆုံး ပြန်လည်ပူးပေါင်းလာမဲ့ ကစားသမားတစ်ဦး ဖြစ်လာဖို့ရှိနေပါတယ်။ သူ့လိုပဲ အသင်းဆီပြန်လာဖို့ရှိနေတဲ့ နောက်ထပ် ကစားသမားတစ်ဦးကတော့ အငှားသက်တမ်း ကုန်ဆုံးတော့မဲ့ အန်းဒရစ် ပဲ ဖြစ်ပါတယ်။
နီကိုပက်ဇ် ရဲ့ တန်ဖိုးဟာ ပြီးခဲ့တဲ့ နှစ်အတွင်း သိသိသာသာ မြင့်တက်လာခဲ့တာပါ။ စီရီအေ ရဲ့ အဆင့်အမြင့်ဆုံး ကွင်းလယ်လူတွေထဲက တစ်ဦးအဖြစ် သတ်မှတ်ခံရပြီးနောက် လာမဲ့ကမ္ဘာ့ဖလား ပြိုင်ပွဲအတွက် အာဂျင်တီးနားအသင်းရဲ့ လူစာရင်းမှာလည်း သူ ပါဝင်လာဖို့မျှော်လင့်ရပြီး ဒါဟာ သူ့ရဲ့ပုံရိပ် ဘယ်လောက်အထိ မြန်မြန်ဆန်ဆန် တိုးတက်လာလဲဆိုတာကို ပြသနေတဲ့ သက်သေတစ်ခုပဲ ဖြစ်ပါတယ်။
Source : https://sports.yahoo.com/
