လီယွန်နယ် မက်ဆီ ဟာ အင်္ဂါနေ့ည (မြန်မာစံတော်ချိန် – ဗုဒ္ဓဟူးနေ့မနက်) က အယ်လ်ဂျီးရီးယား နဲ့ ယှဉ်ပြိုင်ခဲ့တဲ့ပွဲစဉ်မှာ သူ့ရဲ့ ပထမဆုံးသော ကမ္ဘာ့ဖလား ဟက်ထရစ်ကို သွင်းယူပေးခဲ့သလို မီရိုဆလပ် ကလိုဆေး ရဲ့ ကမ္ဘာ့ဖလား သမိုင်းတစ်လျှောက် ဂိုးသွင်းအများဆုံး စံချိန်ကိုလည်း လိုက်မှီသွားခဲ့ပါတယ်။ ဒါဟာ အာဂျင်တီးနား အသင်းကို အားပေးဖို့အတွက် Arrowhead ကွင်းကြီးထဲမှာ ပြည့်နှက်နေတဲ့ ထောင်ပေါင်းများစွာသော ပရိသတ်တွေအတွက် ဘယ်တော့မှ မေ့နိုင်တော့မှာမဟုတ်တဲ့ အမှတ်တရ အခိုက်အတန့်တစ်ခု ဖြစ်ခဲ့ပါတယ်။
မက်ဆီ ဟာ ပွဲစပြီး မိနစ်ပိုင်းအတွင်းမှာတင် သူ့ရဲ့ အင်တာမိုင်ယာမီ အသင်းဖော် ရိုဒရီဂို ဒီ ပေါလ် ရဲ့ ဖန်တီးပေးမှုကနေတစ်ဆင့် ပထမဆုံး အဖွင့်ဂိုးကို သွင်းယူခဲ့ပါတယ်။ ဒုတိယဂိုးကိုတော့ ဒုတိယပိုင်း အစောပိုင်းမှာ သွင်းယူခဲ့ပြီး တတိယဂိုးကိုတော့ ကွင်းအတွင်းက ပရိသတ်တွေရဲ့ ထိုင်ရာကထ လက်ခုပ်တီး ချီးကျူးသံတွေကြားထဲကနေ လူစားမလဲခင်လေးတင် သွင်းယူသွားခဲ့တာ ဖြစ်ပါတယ်။
ဒီဂိုးတွေဟာ မက်ဆီ ကမ္ဘာ့ဖလားပြိုင်ပွဲမှာ အာဂျင်တီးနား အသင်းအတွက် ဆားဘီးယား အင်န် မွန်တီနီဂရိုး အသင်းနဲ့ ပထမဆုံးပွဲ ထွက်ကစားခဲ့တဲ့နေ့ကနေ ကွက်တိ အနှစ် ၂၀ ပြည့်တဲ့နေ့မှာ ထွက်ပေါ်လာခဲ့တာ ဖြစ်ပါတယ်။ အဲဒီတုန်းက ပွဲမှာလည်း သူ ဂိုးသွင်းယူနိုင်ခဲ့ပြီး အခုအခါမှာတော့ သူဟာ ကမ္ဘာ့ဖလားပြိုင်ပွဲ ငါးကြိမ်မှာ ဂိုးသွင်းယူနိုင်တဲ့ ဒုတိယမြောက် ကစားသမား ဖြစ်လာခဲ့ပါပြီ။
မက်ဆီ ဟာ ကမ္ဘာ့ဖလား ပွဲစဉ် ၁၆ ပွဲ ကစားထားရာမှာ ၁၆ ဂိုးအထိ သွင်းယူထားနိုင်တာကြောင့် လာမဲ့သီတင်းပတ်တွေအတွင်း ကလိုဆေး ရဲ့ စံချိန်ကို ကျော်ဖြတ်သွားဖို့ သေချာသလောက် ရှိနေပါတယ်။ ဒီဟက်ထရစ်ဟာ သူ့ရဲ့ ကစားသမားဘဝ ၆၁ ကြိမ်မြောက် ဟက်ထရစ်ဖြစ်ပြီး အမျိုးသားလက်ရွေးစင်အသင်းနဲ့ဆိုရင်တော့ ၁၁ ကြိမ်မြောက် ရှိခဲ့ပြီ ဖြစ်ပါတယ်။
ဒါတင်မကသေးဘဲ မက်ဆီ အနေနဲ့ ကမ္ဘာ့ဖလား ငါးပွဲဆက်တိုက် ဂိုးသွင်းယူနိုင်ခဲ့တာလည်း ဖြစ်ပါတယ်။ ဒီဟက်ထရစ် သွင်းယူနိုင်မှုဟာ အင်္ဂါနေ့က ပွဲကြီးပွဲကောင်းတွေ ကစားခဲ့ကြတဲ့ ကမ္ဘာ့ဘောလုံးလောကရဲ့ အခြားသော နာမည်ကြီး ကြယ်ပွင့်တွေဖြစ်တဲ့ ပြင်သစ် တိုက်စစ်မှူး ကီလီယံ အမ်ဘာပေ နဲ့ နော်ဝေ တိုက်စစ်မှူး အားလင်း ဟာလန်း တို့ရဲ့ ခြေစွမ်းပြမှုတွေကိုပါ လွှမ်းမိုးသွားခဲ့ပါတယ်။
အမ်ဘာပေ ဟာ အဲဒီနေ့ အစောပိုင်းက ကစားခဲ့တဲ့ ဆီနီဂေါ နဲ့ ပွဲမှာ ပြင်သစ် က ၃-၁ နဲ့ နိုင်တဲ့ပွဲစဉ်အတွင်း နှစ်ဂိုး သွင်းယူခဲ့ပြီး ကမ္ဘာ့ဖလား ဂိုးသွင်းအများဆုံးစာရင်းရဲ့ အဆင့် ၄ နေရာမှာ ၁၄ ဂိုးနဲ့ ပူးတွဲရပ်တည်နေပါတယ်။ တစ်ချိန်တည်းမှာပဲ ဟာလန်း ကလည်း အီရတ် ကို ၄-၁ နဲ့ အနိုင်ရတဲ့ပွဲမှာ နော်ဝေ အတွက် နှစ်ဂိုး သွင်းယူပေးခဲ့ပါတယ်။
လာမဲ့အပတ်မှာ အသက် ၃၉ နှစ် ပြည့်တော့မဲ့ မက်ဆီ ဟာ ကမ္ဘာ့ဖလား မတိုင်ခင်က အင်တာမိုင်ယာမီ အသင်းမှာ ကစားရင်း ပေါင်နောက်ကြော ဒဏ်ရာအနည်းငယ် ရရှိထားတာကြောင့် ခြေစွမ်းပြဖို့ နှေးကွေးနေခဲ့ပါတယ်။ ဒါပေမဲ့ ကမ္ဘာ့အကောင်းဆုံး ကစားသမားဆုဖြစ်တဲ့ Ballon d’Or ကို ရှစ်ကြိမ်တိုင်တိုင် ရရှိထားတဲ့ သူကတော့ ပြီးခဲ့တဲ့အပတ်က အိုက်စလန် နဲ့ ကစားခဲ့တဲ့ ခြေစမ်းပွဲမှာ မိနစ် ၂၀ ပဲ ပါဝင်ကစားခဲ့ပြီး ပင်နယ်တီကနေ ဂိုးသွင်းယူကာ ခြေစွမ်းပြနိုင်ခဲ့ပါတယ်။
မက်ဆီ အနေနဲ့ အယ်လ်ဂျီးရီးယား နဲ့ ပွဲမှာ ပါဝင်ကစားခဲ့တာဟာ ၂၀၀၅ ခုနှစ် အသက် ၁၈ နှစ်အရွယ်က စတင်ခဲ့တဲ့ သူ့ရဲ့ နိုင်ငံတကာ ကစားသမားဘဝ ၂၀၀ မြောက် ပွဲစဉ် ဖြစ်ခဲ့ပါတယ်။ သူ့ထက် ပွဲအရေအတွက် ပိုများတဲ့ ကစားသမားဆိုလို့ ဗုဒ္ဓဟူးနေ့မှာ ၂၂၉ ပွဲမြောက် ကစားမဲ့ ပေါ်တူဂီ က ရော်နယ်ဒို နဲ့ ကူဝိတ် အသင်းအတွက် ၂၀၂ ပွဲ ကစားပေးခဲ့တဲ့ ဘာဒါ အယ်လ်မူတာဝါ တို့ပဲ ရှိပါတော့တယ်။
အာဂျင်တီးနား အသင်းဟာ Kansas City မက်ထရိုဒေသမှာ စခန်းချ လေ့ကျင့်နေတဲ့ အသင်း ၄ သင်းထဲက တစ်သင်း ဖြစ်ပါတယ်။ ကမ္ဘာ့အခြားနေရာတွေလိုပဲ အာဂျင်တီးနား အသင်း လွန်ခဲ့တဲ့ နှစ်ပတ်လောက်ကတည်းက ရောက်ရှိလာချိန်ကစလို့ ဒီဒေသတစ်ခုလုံးမှာ မက်ဆီရူးသွပ်မှုလှိုင်း (Messi-mania) က အကြီးအကျယ် ရိုက်ခတ်နေခဲ့တာပါ။
ပွဲကစားတဲ့နေ့မှာတော့ သူ့ရဲ့ ကျောနံပါတ် ၁၀ ဂျာစီကို ဝတ်ဆင်ထားတဲ့ ထောင်ပေါင်းများစွာသော ပရိသတ်တွေဟာ Kansas City ဆင်ခြေဖုံးမှာရှိတဲ့ NFL အသင်း Chiefs ရဲ့ ကွင်းကြီးထဲကို ချီတက်လာခဲ့ကြပြီး ရိုဆာရီယို မြို့က မွေးဖွားခဲ့တဲ့ သူတို့ရဲ့ သူရဲကောင်းကို ချီးကျူးတဲ့ သီချင်းတွေကို သီဆိုခဲ့ကြပါတယ်။ တစ်ချိန်တည်းမှာပဲ မြို့လယ်က Power & Light District မှာ ပြုလုပ်တဲ့ ပွဲကြည့်ပွဲအတွင်းမှာ NFL ကွာတားဘက်ဟောင်းကနေ Fox အားကစားရုပ်သံတင်ဆက်သူ ဖြစ်လာတဲ့ ဂျမေရစ် ဝင်စတန် နဲ့အတူ ဆိတ်တစ်ကောင်က အာဂျင်တီးနား ဂျာစီကို ဝတ်ဆင်ပြီး စင်ပေါ်ကို တက်လာခဲ့ပါသေးတယ်။
ဒီလို ရယ်စရာကောင်းတဲ့ အခိုက်အတန့်ကတော့ နောက်ထပ် တစ်နာရီအကြာမှာ ဂိုးသွင်းယူမဲ့ မက်ဆီ အတွက် ကြီးကျယ်ခမ်းနားတဲ့ ညတစ်ည ဖြစ်လာလိမ့်မယ်ဆိုတာကို ကြိုတင်နိမိတ်ပြခဲ့သလိုပါပဲ။ သူ ကမ္ဘာ့ဖလားမှာ ဂိုးတွေ ထပ်ခါထပ်ခါ သွင်းယူနေတာနဲ့အမျှ သူဟာ ဘောလုံးလောကရဲ့ GOAT (သမိုင်းတစ်လျှောက် အကောင်းဆုံးကစားသမား) ဖြစ်တယ်ဆိုတဲ့ အချက်ကို ငြင်းခုံနေစရာ လုံးဝမလိုတော့တာ ထင်ရှားလှပါတယ်။
THAT'S A WORLD CUP HAT TRICK FOR MESSI 🇦🇷 pic.twitter.com/7qSj3wGfTL
— Sportsnet (@Sportsnet) June 17, 2026
Source : https://www.sportsnet.ca/
