ပရီးမီးယားလိဂ် ရာသီသစ် ပြန်စချိန်မှာတော့ မန်ချက်စတာ ယူနိုက်တက် အနေနဲ့ အဖွင့်ပွဲမှာ ဟားလ်စီးတီး ကို ရှုံးနိမ့်ခဲ့ပြီး တည်ကန်ဘော ခံစစ်အားနည်းချက်တွေ ပြန်လည်ပေါ်ထွက်လာခဲ့ပါတယ်။ ဒါ့အပြင် လိဒ်စ် ယူနိုက်တက် အတွက် အီသန် အမ်ပါဒူး ရဲ့ ဘောလုံးပစ်ပေါက်မှုတွေက ဘယ်လောက်တောင် အန္တရာယ်ရှိတဲ့ လက်နက်ဖြစ်လာသလဲဆိုတာကို The Radar ကဏ္ဍကနေ သုံးသပ်ဖော်ပြထားပါတယ်။
မန်ချက်စတာ ယူနိုက်တက် အသင်း စိတ်ဓာတ်ပိုင်းအားနည်းလို့ ရှုံးခဲ့တာဆိုတဲ့အချက်ကို နည်းပြ မိုက်ကယ် ကာရစ် က ငြင်းဆိုခဲ့ပြီး ပေးလိုက်ရတဲ့ ၂ ဂိုးစလုံးဟာ တည်ကန်ဘောတွေကနေ လာတာဖြစ်ကြောင်း ထောက်ပြခဲ့ပါတယ်။
ဟားလ်စီးတီး အတွက် ဆီမီ အာဂျာယီ အနီးကပ် ပိတ်သွင်းသွားတဲ့ ပထမဂိုးဟာ ပြီးခဲ့တဲ့ရာသီအစကတည်းက ကြည့်ရင် မန်ချက်စတာ ယူနိုက်တက် တို့ ထောင့်ကန်ဘောကနေ ၁၂ ဂိုးမြောက် ပေးလိုက်ရတာဖြစ်ပြီး လိဒ်စ် ယူနိုက်တက် နဲ့အတူ လက်ရှိ ပရီးမီးယားလိဂ် မှာ ဂိုးအများဆုံး ပေးထားရတဲ့ မှတ်တမ်းလည်း ဖြစ်နေပါတယ်။
အာဂျာယီ ရဲ့ အဖွင့်ဂိုးအပြင် နိုဘယ် မန်ဒီ က ဖရီးကစ်ကနေ ဒုတိယဂိုး သွင်းယူခဲ့တာပါ။ ပြီးခဲ့တဲ့ရာသီ နောက်ဆုံး ၂ လအတွင်းမှာလည်း ခရစ္စတယ် ပဲလေ့စ်၊ အက်စတွန် ဗီလာ၊ ဘရန့်ဖို့ဒ် နဲ့ နော်တင်ဟမ် ဖောရက်စ် တို့နဲ့ ပွဲတွေမှာ ထောင့်ကန်ဘောကနေ ဂိုးတွေ ဆက်တိုက်ပေးခဲ့ရပါသေးတယ်။
ပြီးခဲ့တဲ့ရာသီက အဲ့ဒီလို ဂိုးတွေ ပေးခဲ့ရပေမဲ့ ၄ ပွဲစလုံး အနိုင်ရပြီး အဆင့် ၃ နဲ့ ရာသီသိမ်းနိုင်ခဲ့လို့ ပြဿနာမရှိခဲ့ပါဘူး။ ဒါပေမဲ့ ဗီဒီယိုတွေကို ပြန်ကြည့်ရင် ပြိုင်ဘက်တွေအတွက် ဂိုးရဖို့ အရမ်းလွယ်ကူအောင် လုပ်ပေးခဲ့သလို ဖြစ်နေပါတယ်။
ဟာရီ မက်ဂွါရီ က သူ့အသင်းဖော် နူဆဲယား မာဇရာဝီ ကို ကိုင်လှုပ်ဆွဲထားမိလို့ အာဂျာယီ ဂိုးသွင်းဖို့ နေရာလွတ် ရသွားသလိုမျိုးပဲ ပဲလေ့စ်၊ ဗီလာ နဲ့ ဖောရက်စ် တို့အတွက် ဂိုးသွင်းခဲ့တဲ့ မက်ဆန်းစ် လာခရော့စ်၊ ရော့စ် ဘာကလေ နဲ့ မိုရာတို တို့ဟာလည်း ဘယ်သူ့ရဲ့ ဖိအားပေး ဟန့်တားမှုမှ မခံခဲ့ရပါဘူး။
ဒီလို ထောင့်ကန်ဘောနဲ့ တည်ကန်ဘောတွေ ကာကွယ်ရာမှာ အားနည်းချက်ရှိနေတာကို ဟားလ်စီးတီး နည်းပြ ဆာဂေး ယာကီရိုဗစ် က ရိပ်မိခဲ့ပြီး ပွဲအပြီးသတင်းစာရှင်းလင်းပွဲမှာ ဒီအားနည်းချက်ကို အသုံးချဖို့ သူ့လက်ထောက်နဲ့ ဗီဒီယိုသုံးသပ်သူတွေ ပူးပေါင်းပြင်ဆင်ခဲ့ကြောင်း ပြောသွားခဲ့ပါတယ်။
ဇန်နဝါရီလက ရောက်လာတဲ့ ကာရစ် အနေနဲ့ သူ့လက်ထက်မှာ အသင်းခံစစ် သိသိသာသာ တိုးတက်လာတယ်လို့ အကြောင်းပြနိုင်ပါတယ်။ သူ မရောက်ခင်က ၂၁ ပွဲမှာ ၃၁ ဂိုးအထိ ပေးခဲ့ရပေမဲ့ သူရောက်ပြီးနောက် ၁၈ ပွဲမှာတော့ ၂၀ ဂိုးသာ ပေးခဲ့ရပါတယ်။
ဒါပေမဲ့ သူ စတင်ကိုင်တွယ်ချိန်ကစပြီး ပေးဂိုးတွေထဲမှာ တည်ကန်ဘောကနေ ပေးရတဲ့ ရာခိုင်နှုန်းဟာ ပရီးမီးယားလိဂ် မှာ တတိယမြောက် အများဆုံး ဖြစ်နေတာကတော့ ကြီးမားတဲ့ ပြဿနာတစ်ခုအဖြစ် ရှိနေဆဲဖြစ်ကြောင်း ပြသနေပါတယ်။
Source : https://www.skysports.com/
