ရာသီအဖွင့်ပွဲမှာ အာဆင်နယ် အသင်းရဲ့ ခြေစွမ်းပြနိုင်ပွဲကြောင့် ဂန်းနားတို့ဟာ သူတို့ရဲ့ ပရီးမီးယားလိဂ် ချန်ပီယံဆုကို ဆက်ထိန်းထားနိုင်တော့မယ်လို့ ပရိသတ်အချို့က ယုံကြည်နေကြပါပြီ။ အသက် ၂၄ နှစ်အရွယ်ရှိပြီဖြစ်တဲ့ ဆာကာ ဟာ ပြီးခဲ့တဲ့ မတ်လတုန်းက ရခဲ့တဲ့ ခြေဖနောင့်ဒဏ်ရာကြောင့် ပြီးခဲ့တဲ့ရာသီအကုန်ပိုင်း လန်ဒန်မြောက်ပိုင်း အသင်းကြီးအတွက်ရော ကမ္ဘာ့ဖလား မှာ အင်္ဂလန် အသင်းအတွက်ပါ ကစားချိန်ကို ထိန်းညှိပြီး ကစားခဲ့ရတာပါ။
ဆာကာ ဟာ မတ်လ နိုင်ငံတကာပွဲစဉ်တွေနဲ့ အာဆင်နယ် ရဲ့ ၇ ပွဲကို လွဲချော်ခဲ့ပေမဲ့ အသင်းဆီပြန်လာပြီး ၂၂ နှစ်အတွင်း ပထမဆုံးအကြိမ် ပရီးမီးယားလိဂ် ဖလားကို ဆွတ်ခူးနိုင်အောင် ကူညီပေးခဲ့ပါတယ်။ ဒါပေမဲ့ ဘူဒါပက်စ် မှာ ပီအက်စ်ဂျီ ကို ရှုံးနိမ့်ခဲ့တဲ့ ချန်ပီယံလိဂ် ဗိုလ်လုပွဲမှာတော့ ဒီတောင်ပံကစားသမားဟာ လူစားလဲခံခဲ့ရပြီး သူ့ရဲ့ခြေစွမ်းအပေါ် ဝေဖန်မှုတွေလည်း ရှိခဲ့တာပါ။
အင်္ဂလန် နည်းပြ သောမတ်စ် တူချယ် ကလည်း ကမ္ဘာ့ဖလား မှာ သူ့ရဲ့ကစားချိန်ကို ကန့်သတ်ပေးခဲ့ပါတယ်။ ဒါပေမဲ့ ကြံ့ခိုင်မှု ၁၀၀ ရာခိုင်နှုန်းမပြည့်ဘဲ ဝေဖန်ခံရတာကို စိတ်ပျက်မိသလားလို့ မေးတဲ့အခါမှာတော့ ဆာကာ က ဒါဟာ သူကိုယ်တိုင်ရယူချင်ခဲ့တဲ့ “စွန့်စားမှုတစ်ခု” ဖြစ်တယ်လို့ ဖြေခဲ့ပါတယ်။
ပြိုင်ပွဲအပြီး အနားယူခွင့်ရခဲ့တာကြောင့် ဆာကာ ဟာ ဒီရာသီကို အကောင်းဆုံးပုံစံနဲ့ ပြန်စတင်နိုင်ခဲ့ပုံပါပဲ။ ပြီးခဲ့တဲ့ သောကြာနေ့က တန်းတက် ကိုဗင်ထရီ နဲ့ ပွဲမှာ သူဟာ ခြေစွမ်းပြခဲ့ပြီး နောက်ခံလူ ဂျေး ဒါဆေးလ်ဗား ကို အတော်လေးအခက်တွေ့စေခဲ့သလို ၃-၀ နဲ့ နိုင်တဲ့ပွဲမှာ ဒုတိယဂိုးကိုလည်း သွင်းယူပေးခဲ့ပါတယ်။
ဆာကာ တစ်ယောက် ညာတောင်ပံကနေ ထိုးဖောက်ပြေးလွှားပြီး အာဆင်နယ် ရဲ့ တိုက်စစ်အများစုမှာ ပါဝင်နေတဲ့မြင်ကွင်းက ပရိသတ်တွေအတွက်တော့ အရမ်းကိုဝမ်းသာစရာပါပဲ။ ဘာလို့လဲဆိုတော့ ပြီးခဲ့တဲ့ရာသီက မကြာခဏ ဒဏ်ရာကြောင့် အပြည့်အဝ မကစားနိုင်ခဲ့ပေမဲ့ ဆာကာ ဟာ အသင်းအတွက် ၄၉ ပွဲအထိ ပါဝင်ကစားပေးခဲ့ပြီး သူပါဝင်တဲ့အချိန်တွေမှာ အာဆင်နယ် ရဲ့ အနိုင်ရရှိမှု ရာခိုင်နှုန်းက သိသိသာသာကို ပိုကောင်းမွန်ခဲ့လို့ပါပဲ။
Source : https://www.bbc.com/
