ဂျက် ဂရီးလစ်ရှ် ဟာ လောလောဆယ်တော့ မန်ချက်စတာ စီးတီး အသင်းဆီ ပြန်ရောက်လာခဲ့ပါပြီ။
အသက် ၃၀ အရွယ် ဒီကစားသမားဟာ အီတီဟတ် ကွင်းမှာ တစ်ပတ်လုပ်ခ ပေါင် ၃ သိန်းရစာချုပ်ရဲ့ နောက်ဆုံးနှစ်ထဲ ရောက်နေပါပြီ။ နည်းပြဟောင်း ပက် ဂွါဒီယိုလာ ရဲ့ နောက်ဆုံးရာသီမှာ အသင်းကနေ ချန်လှပ်ခံခဲ့ရပြီး အဲဗာတန် ဆီ တစ်ရာသီ အငှားထွက်ကစားခဲ့ရပါတယ်။
ပြီးခဲ့တဲ့ ဇန်နဝါရီမှာ ခြေချင်းဝတ်ဒဏ်ရာကြောင့် အငှားခရီးလမ်း ရပ်တန့်ခဲ့ရပေမဲ့ အခုတော့ ကြံ့ခိုင်မှုအပြည့်ပြန်ရလာပြီး ဒီရာသီ မန်စီးတီး ရဲ့ ပွဲ ၂ ပွဲစလုံးမှာ ပါဝင်ကစားခွင့် ရခဲ့ပါတယ်။
အာဆင်နယ် ကို ရှုံးခဲ့တဲ့ ကွန်မြူနတီဒိုင်းပွဲမှာ လူစားဝင်ကစားခဲ့သလို တနင်္ဂနွေနေ့က ဘုန်းမောက် ကို အနိုင်ရတဲ့ပွဲမှာလည်း ပွဲပြီးခါနီး ၈ မိနစ် ဝင်ကစားခဲ့ပါတယ်။ ပွဲကြည့်စင်ထိုင်ခုံမှာ စိတ်လက်ပေါ့ပါးစွာတွေ့ခဲ့ရတဲ့ တောင်ပံကစားသမားဟာ ပရိသတ်တွေရဲ့ ကြိုဆိုမှုအတွက် ဆိုရှယ်မီဒီယာကနေ ကျေးဇူးတင်စကား ဆိုခဲ့ပါတယ်။
နည်းပြသစ် အန်ဇို မာရက်စ်ကာ လက်အောက်မှာ အခွင့်အရေးသစ်တွေရနေပေမဲ့ စက်တင်ဘာ ၁ ရက် အပြောင်းအရွှေ့ ဈေးကွက်မပိတ်ခင်အထိ မန်စီးတီး မှာ ဆက်ရှိမယ်လို့တော့ အာမမခံနိုင်သေးပါဘူး။
ဇူလိုင်လလယ် ရာသီကြို လေ့ကျင့်ရေးမှာ ဂရီးလစ်ရှ် ကို တွေ့ခဲ့ရပြီး အာရှခရီးစဉ်ကို ဒဏ်ရာကြောင့် လွဲချော်ခဲ့ပါတယ်။ ဗီလာ ကစားသမားဟောင်းဟာ နည်းပြသစ် ရောက်လာမှုကို အစပျိုးမှုအသစ်အဖြစ်မြင်ပြီး လေ့ကျင့်ရေးမှာ ခြေစွမ်းပြနိုင်ခဲ့လို့ လူစာရင်းထဲ ပြန်ပါလာတာပါ။
အပြောင်းအရွှေ့ နောက်ဆုံးရက်သတ္တပတ်ထဲ ရောက်လာချိန်မှာတော့ အသင်းမှာ ဆက်နေမလား၊ ထပ်ပြီး အငှားထွက်မလား၊ အပြီးထွက်ခွာမလားဆိုတဲ့ ရွေးချယ်စရာလမ်းတွေ အကုန်ပွင့်နေပါတယ်။ နည်းပြ မာရက်စ်ကာ ကလည်း သူ့တာဝန်က ဂျက် ကို အကောင်းဆုံး နည်းပြပေးဖို့ဖြစ်ပြီး နောက်တစ်ပတ်မှာ ဘာဆက်ဖြစ်မလဲ စောင့်ကြည့်ရမယ်လို့ ဖွင့်ဟခဲ့ပါတယ်။
ပြီးခဲ့တဲ့ရာသီ အဲဗာတန် မှာ ကစားခဲ့တုန်းက ဒဏ်ရာမရခင်အထိ ပွဲ ၂၀ မှာ ၂ ဂိုးသွင်း၊ ၆ ဂိုး ဖန်တီးပေးပြီး အကောင်းဆုံးပုံစံ ပြသနိုင်ခဲ့ပါတယ်။ ဩဂုတ်လရဲ့ တစ်လတာ အကောင်းဆုံးဆုပါရခဲ့လို့ ပရိသတ်တွေရဲ့ အချစ်တော် ဖြစ်ခဲ့ပါတယ်။ လောလောဆယ်တော့ တရားဝင် ကမ်းလှမ်းမှုမရှိသေးပေမဲ့ အသင်းပြောင်းဖြစ်ရင် အဲဗာတန် ဆီ ပြန်သွားဖို့က အဖြစ်နိုင်ဆုံးပါပဲ။
အဲဗာတန် ဘက်က ကမ်းလှမ်းမှု မလုပ်ရသေးပေမဲ့ ဆက်သွယ်မှုတော့ ရှိနေဆဲဖြစ်ကြောင်း အသင်းအမှုဆောင်ချုပ် အန်းဂတ်စ် ကင်နီးယား က အတည်ပြုထားပါတယ်။
Source : https://www.bbc.com/
