ပီအက်စ်ဂျီ (PSG) နည်းပြ လူးဝစ် အင်းနရစ်က လီဗာပူးနဲ့ ချန်ပီယံလိဂ် ကွာတားဖိုင်နယ်မှာ တွေ့ဆုံရမှာက မနှစ်က ပင်နယ်တီနဲ့ အနိုင်ရခဲ့တဲ့ပွဲကို သတိရစေပြီး “လှပတဲ့ အမှတ်တရတွေ” ပြန်ပေးတယ်လို့ သောကြာနေ့မှာ ပြောလိုက်ပါတယ်။
“အဲ့ဒီတုန်းက လီဗာပူးက ဥရောပမှာ အကောင်းဆုံးအသင်း ဖြစ်နေချိန်မှာ ဘယ်သူမှ ဂရုမစိုက်ကြခင် အာနယ် ဆလော့တ်က ပီအက်စ်ဂျီအကြောင်း ကောင်းကောင်းပြောခဲ့တာကို ကျွန်တော် မှတ်မိနေပါတယ်” လို့ အင်းနရစ်က ဆိုပါတယ်။ “ဒါဟာ ကျွန်တော်တို့အတွက် အရမ်းကောင်းတဲ့ အချက်ဖြစ်သလို အမှတ်တရကောင်းတဲ့ ပွဲစဉ်တစ်ခုလည်း ဖြစ်ခဲ့ပါတယ်” လို့ သူက ဆက်ပြောပါတယ်။
ပြီးခဲ့တဲ့နှစ် ၁၆ သင်းအဆင့်မှာ ပီအက်စ်ဂျီက အန်ဖီးလ်ကွင်းမှာ ၁-၀ နဲ့ နိုင်ခဲ့ပြီး ပါရီကွင်းက ၁-၀ ရှုံးပွဲကို ချေပနိုင်ခဲ့ကာ ပင်နယ်တီအဆုံးအဖြတ်မှာ ၄-၁ နဲ့ အနိုင်ရခဲ့တာပါ။ အဲ့ဒီနောက် အင်းနရစ်ရဲ့အသင်းဟာ ကလပ်သမိုင်းတစ်လျှောက် ပထမဆုံးအကြိမ်အဖြစ် ချန်ပီယံလိဂ်ဖလားကို သိမ်းပိုက်နိုင်ခဲ့ပါတယ်။ တစ်ဖက်မှာလည်း လီဗာပူးက ပြီးခဲ့တဲ့ရာသီက ပရီးမီးယားလိဂ်ချန်ပီယံ ဖြစ်ခဲ့တာကြောင့် အဲ့ဒီပွဲမှာ သူတို့ကိုပဲ ရေပန်းအစားဆုံးလို့ သတ်မှတ်ခဲ့ကြတာပါ။
ဒါပေမဲ့ အခုတစ်ခေါက်မှာတော့ ဆလော့တ်ရဲ့ အသင်းက အရင်လို သိပ်ပြီးကြောက်စရာမကောင်းတော့ဘဲ ပရီးမီးယားလိဂ်ဇယားရဲ့ အဆင့် ၅ နေရာမှာပဲ ရှိနေပါတယ်။
“အခု ငါတို့က ရေပန်းစားနေပြီလား။ ကျွန်တော်ကတော့ အမြဲတမ်း အသင်းအပေါ် ပြောဆိုနေကြတာတွေကို ချိန်ဆထိန်းသိမ်းဖို့ ကြိုးစားပါတယ်။ ကျွန်တော့်ဆီမှာ တော်တဲ့ကစားသမားတွေရှိပြီး သူတို့က ဒီလိုပွဲမျိုးမှာ ဘယ်သူကမှ ရေပန်းစားတာမျိုးမရှိဘဲ နှစ်ဖက်လုံး ဘယ်လိုကစားရမလဲဆိုတာ ကောင်းကောင်းသိတယ်လို့ ယုံကြည်ပါတယ်” လို့ အင်းနရစ်က စနေနေ့မှာကစားမဲ့ နိစ်နဲ့ပွဲမတိုင်ခင် ပြောခဲ့ပါတယ်။
လက်ရှိမှာ ပီအက်စ်ဂျီက လန်းစ်ထက် ၁ မှတ်အသာနဲ့ ပြင်သစ်လိဂ်ဇယားထိပ်မှာ ရှိနေပြီး ပွဲကစားဖို့ တစ်ပွဲလည်း ကျန်ပါသေးတယ်။ ပြီးခဲ့တဲ့အပတ်က နန့်စ်နဲ့ပွဲကို ရွှေ့ဆိုင်းလိုက်တာက ချဲလ်ဆီးနဲ့ ချန်ပီယံလိဂ်ပွဲစဉ်တွေကြားမှာ ကစားသမားတွေကို အနားပေးချင်လို့ပါ။ ဒါကြောင့် ဧပြီ ၁၁ ရက်မှာကစားမဲ့ လန်းစ်နဲ့ပွဲကိုရော လီဗာပူးနဲ့ပွဲစဉ်တွေကြားမှာ ထပ်ရွှေ့ခိုင်းမလားဆိုတဲ့ မေးခွန်းတွေ ထွက်လာပါတယ်။
အင်းနရစ်ကတော့ “သတင်းတွေ ထပ်ကြားရဖို့ စောင့်ချင်ပါသေးတယ်။ အသင်းတိုင်းကတော့ အကောင်းဆုံးအခြေအနေမှာ ကစားချင်ကြတာပဲ။ ဒါပေမဲ့ တခြားအသင်းတွေရဲ့ အကျိုးစီးပွားကိုလည်း နားလည်ပေးဖို့ လိုပါတယ်” လို့ ဆိုပါတယ်။
တစ်ဆက်တည်းမှာပဲ အရန်ဂိုးသမား မတ်ဗေး ဆာဖိုနော့ဗ်ကို နေရာပေးထားရလို့ ပွဲထွက်ခွင့် ပျောက်ဆုံးနေတဲ့ လူကပ်စ် ရှီဗာလီယာ ပြင်သစ်လက်ရွေးစင်အသင်းမှာ ရွေးချယ်ခံရတဲ့အတွက် ဝမ်းသာကြောင်း အင်းနရစ်က ပြောပါတယ်။
“သူ ရွေးချယ်ခံရတာ တကယ်ကို ထိုက်တန်ပါတယ်။ ဇန်နဝါရီ ၂၃ ရက်က အော်ဇေးနဲ့ပွဲမှာ နောက်ဆုံးပွဲထွက်ခဲ့ပြီးကတည်းက ၁၁ ပွဲဆက်တိုက် အရန်ခုံမှာပဲ ထိုင်နေခဲ့ရပေမဲ့ ကျွန်တော့်ရဲ့ ကစားသမားကို ကျွန်တော် အမြဲကာကွယ်ပါတယ်။ သူ့ရဲ့ အရည်အချင်းအပေါ် ကျွန်တော့်အမြင်က အပြောင်းအလဲမရှိပါဘူး” လို့ မိုက် မိုင်နန်ရဲ့ အရန်အဖြစ် ရွေးချယ်ခံရတဲ့ ရှီဗာလီယာအကြောင်း ပြောသွားပါတယ်။
နိစ်နဲ့ပွဲမှာတော့ ပီအက်စ်ဂျီဟာ ဒဏ်ရာပြဿနာတွေကြောင့် ဂျာအို နေးဗက်စ်၊ ဖာဘီယန် ရူးစ် နဲ့ ဘရတ်ဒလေ ဘာကိုလာ တို့ကို အသုံးပြုနိုင်မှာ မဟုတ်ပါဘူး။
Source : https://www.france24.com/
