ကမ္ဘာ့ဖလားအရှိန်အဟုန်ကြားက သောမတ်စ် တူချယ် ရဲ့ စိန်ခေါ်မှု

ကမ္ဘာ့ဖလားအရှိန်အဟုန်ကြားက သောမတ်စ် တူချယ် ရဲ့ စိန်ခေါ်မှု အင်္ဂလန် တိုက်စစ် အကြံအိုက်ပြီး ဂါနာ နဲ့ သရေကျမှုကြောင့် ဟာရီ ကန်း ရဲ့ ရွှေဖိနပ်မျှော်လင့်ချက် လမ်းစပျောက်နေ

ခရိုအေးရှား ကို ၄-၂ နဲ့ အနိုင်ရခဲ့တဲ့ အဖွင့်ပွဲစဉ်အပြီးမှာတော့ အင်္ဂလန် အသင်းရဲ့ ကမ္ဘာ့ဖလားမျှော်လင့်ချက်တွေဟာ တကယ့်ကို အားရစရာကောင်းခဲ့ပါတယ်။ ဒါးလပ်စ် မှာ ကစားခဲ့တဲ့ အဲ့ဒီပွဲစဉ်တုန်းက အင်္ဂလန် အသင်းဟာ ခံစစ်ပိုင်း အနည်းငယ်လိုအပ်ချက်ရှိခဲ့ပေမဲ့ ပျော်စရာကောင်းတဲ့ တိုက်စစ်ဆင်မှုတွေနဲ့ ယုံကြည်မှုအပြည့် ရှိနေခဲ့တာပါ။ ဒါပေမဲ့ အင်္ဂါနေ့က ကစားခဲ့တဲ့ ဂါနာ အသင်းနဲ့ ဂိုးမရှိသရေပွဲကတော့ အခြေအနေတွေကို တစ်ဆတ်ဆတ် ပြောင်းလဲသွားစေခဲ့ပါတယ်။

ဒီလို ဂိုးမရှိ သရေကျခဲ့တဲ့ အခြေအနေဟာ နည်းပြ သောမတ်စ် တူချယ် ရှေ့မှာ ရှိနေတဲ့ စိန်ခေါ်မှုတွေကို မီးမောင်းထိုးပြနေပါတယ်။ အင်္ဂလန် အသင်းဟာ ဘောလုံးပိုင်ဆိုင်မှု အသာစီးယူနိုင်ခဲ့ပေမဲ့ သေသေချာချာ ပြင်ဆင်လာတဲ့ ဂါနာ အသင်းရဲ့ခံစစ်ကို ဖောက်ထွက်ဖို့ အဖြေ ရှာမတွေ့ခဲ့ပါဘူး။

နည်းပြ စကာလိုနီ တို့လို ဝါရင့်တွေရဲ့ နည်းဗျူဟာအတိုင်း ဂါနာ အသင်းဟာ ပထမမိနစ်ကတည်းက သရေတစ်မှတ်ရဖို့အတွက် ပွဲထွက်လာခဲ့တာ ဖြစ်ပါတယ်။ သူတို့က ခံစစ်ကို အနိမ့်ဆုံးအထိ ဆွဲပိတ်ပြီး နေရာလွတ်တွေကိုပိတ်ဆို့ကာ အင်္ဂလန် အသင်းကို ဘောလုံးပိုင်ဆိုင်မှုပဲ ပေးထားခဲ့ပါတယ်။ အင်္ဂလန် အသင်းရဲ့ တုံ့ပြန်မှုကတော့ ပုံမှန်အဆင့်ပဲ ရှိခဲ့ပြီး တိုက်စစ်ဇုန်ထဲမှာ ဘာစွန့်စားမှုမှ မလုပ်နိုင်ခဲ့ပါဘူး။

ဘောလုံးပိုင်ဆိုင်မှု ဘယ်လောက်အသာစီးရလဲဆိုရင် ပထမ ၁၂ မိနစ်အတွင်းမှာတင် အင်္ဂလန် က ဘောလုံးပေးပို့မှု ၁၁၁ ကြိမ် ပြုလုပ်ခဲ့ပြီး ဂါနာ က ၁၄ ကြိမ်ပဲ ပြုလုပ်နိုင်ခဲ့ပါတယ်။ ဒါပေမဲ့လည်း အင်္ဂလန် အသင်းဟာ ပွဲကစားချိန် ၃၆ မိနစ်အထိ ပုံမှန်ကစားကွက်ကနေ ဂိုးသွင်းခွင့် တစ်ကြိမ်မှ မဖန်တီးနိုင်ခဲ့သလို ပွဲပြီးခါနီး ၄ မိနစ်အလိုမှာ နီကို အိုရွိုင်လီ ရဲ့ ကန်ချက် ဂိုးဘားတန်းထိခဲ့တာကလွဲရင် တစ်ပွဲလုံးမှာ ဂိုးပေါက်တည့်မှု ၃ ကြိမ်ပဲ ရှိခဲ့ပါတယ်။

အသင်းရဲ့ အဓိကမျှော်လင့်ချက်ဖြစ်တဲ့ ဟာရီ ကန်း ဟာ ဂါနာ အသင်းရဲ့ ဂိုးဧရိယာထဲမှာ ဘောလုံးထိခွင့် ၃ ကြိမ်ပဲရခဲ့ပြီး ပွဲကစားချိန် ၈၇ မိနစ်ရောက်မှသာ အနီးကပ်ကန်သွင်းခွင့် ရခဲ့ပေမဲ့ ဂိုးဘားတန်းပေါ် ကျော်တက်သွားခဲ့ပါတယ်။

“ဂါနာ အသင်းဟာ တကယ့်ကို စိတ်ဓာတ်ပြင်းပြင်းနဲ့ စည်းကမ်းရှိရှိ ခံစစ်ကစားသွားခဲ့တာပါ။ ကျွန်တော် မြင်ဖူးသမျှ ခံစစ်အကောင်းဆုံး အသင်းတွေထဲက တစ်သင်းပါပဲ” လို့ ပွဲအပြီးမှာ သောမတ်စ် တူချယ် က ပြောကြားခဲ့ပါတယ်။ “နေရာလွတ်ရှာဖို့ တကယ့်ကို ခက်ခဲခဲ့ပါတယ်။ ဟာရီ ကန်း ရရှိခဲ့တဲ့ အခွင့်အရေးလေးတွေကလည်း ကံမကောင်းခဲ့ပါဘူး။ နောက်ဆုံးရတဲ့ အခွင့်အရေးဆိုရင် ပုံမှန်ဆို ဂိုးဝင်ရမဲ့ အနေအထားပါ။”

“ကျွန်တော်တို့ ကံမကောင်းခဲ့ပါဘူး။ ခက်ခဲတဲ့ ပွဲတစ်ပွဲပါ။ သူတို့ခံစစ်ကို ဖြိုဖျက်ဖို့ စိတ်ရှည်ရသလို စိတ်ရှည်ရှည်နဲ့ပဲ ထပ်တလဲလဲ တိုက်စစ်ဆင်ခဲ့ရပါတယ်။ ရလဒ်ကတော့ ၀-၀ ပါပဲ” လို့ သောမတ်စ် တူချယ် က ဆိုပါတယ်။

အင်္ဂလန် အသင်းရဲ့ အစဉ်အလာအရ ပွဲကြီးပွဲကောင်းတွေမှာ ရလဒ်ကောင်းရင် ‘ဖလားက အိမ်ပြန်ရောက်တော့မယ်’ လို့ အားပေးကြပြီး ရလဒ်တစ်ခု စိတ်ပျက်စရာဖြစ်တာနဲ့ ‘နောက်လေယာဉ်နဲ့ပဲ အိမ်ပြန်တော့’ ဆိုပြီး စိုးရိမ်တကြီး ဖြစ်တတ်ကြပါတယ်။ သေချာ စဉ်းစားကြည့်ရင်တော့ အင်္ဂလန် အသင်းဟာ ပြီးခဲ့တဲ့ ယူရိုနဲ့ ကမ္ဘာ့ဖလားပြိုင်ပွဲကြီး ၄ ခုလုံးရဲ့ ဒုတိယမြောက် ပွဲစဉ်တွေမှာ သရေကျခဲ့တာဖြစ်ပြီး (အဲ့ဒီထဲက ၃ ပွဲက ၀-၀ ရလဒ်ဖြစ်ပါတယ်) ဒါဟာ အသစ်အဆန်းတော့ မဟုတ်ပါဘူး။

အရင်ကလည်း ဒီလိုအခြေအနေကနေ ဗိုလ်လုပွဲအထိ ၂ ကြိမ် တက်လှမ်းနိုင်ခဲ့ဖူးပါတယ်။ ဒါပေမဲ့ ပြဿနာက သောမတ်စ် တူချယ် ရောက်လာရင် ဒီလိုပုံစံတွေ ပြောင်းလဲသွားလိမ့်မယ်လို့ အားလုံးက မျှော်လင့်ထားခဲ့တာမို့ အခုလိုအရင်ပုံစံအတိုင်း ပြန်ဖြစ်သွားတာက ဒီနွေရာသီမှာ ချန်ပီယံဖြစ်ဖို့ ရည်မှန်းထားတဲ့ အသင်းအတွက် စိုးရိမ်စရာ ဖြစ်လာစေပါတယ်။

“ပြိုင်ပွဲက အရှည်ကြီးပါ။ ကစားသမားတွေ အစွမ်းကုန် ကြိုးစားခဲ့ကြပါတယ်” လို့ ပွဲအပြီးမှာ သောမတ်စ် တူချယ် က ပြောခဲ့ပါတယ်။ ဒါပေမဲ့ အခုအချိန်ဟာ တခြားနည်းလမ်းတစ်ခုခုကို ပြောင်းလဲအသုံးပြုရမဲ့ အချိန်ဖြစ်နေပါပြီ။

အရှုံးသမား: သောမတ်စ် တူချယ်

သောမတ်စ် တူချယ် ဟာ ပထမပွဲစဉ်တုန်းက ကောင်းမွန်တဲ့ရလဒ် ထွက်ပေါ်အောင် စွမ်းဆောင်နိုင်ခဲ့ပြီး ဒီပွဲမှာလည်း အဲ့ဒီနည်းဗျူဟာအတိုင်းပဲ ပွဲထွက်လာခဲ့ပါတယ်။ ဂျွန် စတုန်းစ် နေရာမှာ မာ့ခ် ဂူဟီ ကို ဗဟိုခံစစ်မှာ အသုံးပြုခဲ့တာကလွဲရင် ကျန်တဲ့နေရာတွေကို မပြောင်းလဲဘဲ သုံးစွဲခဲ့တာပါ။ တောင်ပံကစားသမားတွေကို အကျယ်ကြီး ကစားစေပြီး ဗဟိုကွင်းလယ်လူတွေက ဟာရီ ကန်း နဲ့ ဂျုဒ် ဘယ်လင်ဟမ် တို့အတွက် နေရာလွတ်တွေ ဖန်တီးပေးဖို့ ကြိုးစားခဲ့ပါတယ်။

ဒါပေမဲ့ ဘောလုံးပွဲမှာ နှစ်သင်းစလုံး ကစားရတာဖြစ်ပြီး ဂါနာ အသင်းက အင်္ဂလန် ရဲ့ အားသာချက်တွေကို ပိတ်ဆို့ဖို့ ပြင်ဆင်လာခဲ့ပါတယ်။ သူတို့က ခံစစ်အနိမ့် ပိတ်ကစားပြီး အင်္ဂလန် ကို တိုက်စစ်ဆင်ဖို့ စိန်ခေါ်ကာ နေရာလွတ်တွေကို ပိတ်ဆို့ထားခဲ့ပါတယ်။

သောမတ်စ် တူချယ် အနေနဲ့ ကစားကွက်ကို ဒီထက်စောစော ပြောင်းလဲသင့်ခဲ့တာပါ။ ပထမပိုင်း ၄၅ မိနစ်အပြီးမှာတင် တိုက်စစ်ကစားသမားတစ်ယောက် ပိုလိုနေတာ ထင်ရှားနေပေမဲ့ သောမတ်စ် တူချယ် ကတော့ ပွဲကစားချိန် ၆၅ မိနစ်ရောက်မှ ဆာကာ ကို လူစားလဲ ထည့်သွင်းခဲ့ပါတယ်။ မော်ဂန် ရော်ဂျာစ် နဲ့ အီဘာရီချီ အီဇီ တို့ကို နောက်ထပ် ၁၀ မိနစ်အကြာမှ ထည့်ခဲ့ပြီး မားကပ်စ် ရပ်ရှ်ဖို့ဒ် ကိုတော့ နောက်ဆုံး ၁၀ မိနစ်မှ ကစားခွင့်ပေးခဲ့ပါတယ်။

အခြေအနေတွေက တိုးတက်မလာခဲ့သလို အခုဆိုရင် သောမတ်စ် တူချယ် ရဲ့ ကမ္ဘာ့ဖလား လူစာရင်းအပေါ်မှာ မေးခွန်းထုတ်မှုတွေ ရှိလာပါပြီ။ ခံစစ်ပိတ်တာတွေကို ဖောက်ထွက်နိုင်စွမ်းရှိတဲ့ ကိုးလ် ပါးလ်မား နဲ့ ဖီးလ် ဖိုဒန် တို့လို ကစားသမားတွေဟာ လက်ရှိမှာ အားလပ်ရက် အပန်းဖြေခရီး ထွက်နေကြရပါတယ်။ သောမတ်စ် တူချယ် အနေနဲ့ တိုက်စစ်ကစားသမားတချို့ကို ချန်လှပ်ခဲ့ရမှာ မှန်ပေမဲ့ အကယ်၍ မေလကုန်တုန်းက ဆုံးဖြတ်ချက်ကို တခြားနည်းလမ်းနဲ့ ရွေးချယ်ခဲ့ရင် ဒီပွဲက ဒီထက်ပိုကောင်းနိုင်မလားဆိုတာ တွေးစရာ ဖြစ်လာပါတယ်။

လူစာရင်းထက် သောမတ်စ် တူချယ် ရဲ့ အချိန်မီ မပြောင်းလဲနိုင်မှုက ပိုပြီးပြဿနာဖြစ်ခဲ့တာပါ။ အခုတော့ စနေနေ့မှာ ကစားမဲ့ ပနားမား နဲ့ ပွဲစဉ်ကစလို့ စိုးရိမ်စိတ်တွေကို လျှော့ချပြီး နိုင်ပွဲတွေပြန်ရှာဖို့ပဲ လိုအပ်ပါတော့တယ်။

Source : https://www.goal.com/