လီယွန်နယ် မက်ဆီ ဟာ ကမ္ဘာ့ဖလားသမိုင်းတစ်လျှောက် ဂိုးအများဆုံးသွင်းယူထားတဲ့ ကစားသမားဖြစ်လာခဲ့သလို အသင်းအတွက် နောက်ထပ် သွင်းဂိုးတစ်ဂိုးပါ ထပ်မံဖြည့်တင်းပေးခဲ့ပါတယ်။ ဒါကြောင့်လည်း အာဂျင်တီးနား အသင်းဟာ ဒေါသအိုးပေါက်ကွဲစရာ ကောင်းခဲ့တဲ့ ဒဲလပ်စ်က ပွဲစဉ်မှာ သြစတြီးယား ကို ၂-၀ နဲ့ အနိုင်ရရှိပြီး ချန်ပီယံဆုကို ကာကွယ်ဖို့အတွက် နိုင်ပွဲဆက်ခြေလှမ်းကို ထိန်းသိမ်းနိုင်ခဲ့ပါတယ်။
ကမ္ဘာ့အကောင်းဆုံး ကစားသမားကြီးဟာ ပွဲစလို့ ၈ မိနစ်မှာတင် မီရိုစလပ် ကလိုဆေး ရဲ့ စံချိန်ကို ချိုးဖျက်နိုင်ခဲ့သင့်တာပါ။ အဲ့ဒီအချိန်တုန်းက စတီဖန် ပေါ့ရှ် က လော်တာရို မာတီနက်ဇ် ကို ဖျက်ထုတ်ပုံကြမ်းတမ်းခဲ့လို့ အာဂျင်တီးနား ပင်နယ်တီ ရရှိခဲ့ပေမဲ့ မက်ဆီ ရဲ့ ကန်ချက်က ဂိုးတိုင်အပြင်ဘက်ကို ထွက်သွားခဲ့ပါတယ်။
ဒါပေမဲ့ ပြိုင်ဆိုင်မှု ပြင်းထန်လွန်းတဲ့ ဒီပွဲစဉ်မှာ မက်ဆီ တစ်ယောက် သူ့ရဲ့ ၁၇ ဂိုးမြောက် ကမ္ဘာ့ဖလား သွင်းဂိုးကို ရယူဖို့က အချိန်တစ်ခုပဲလိုအပ်တော့တဲ့ အနေအထားမျိုး ဖြစ်ခဲ့ပါတယ်။ ပွဲချိန် ၃၈ မိနစ်မှာတော့ မြင်တွေ့နေကျ ပုံစံအတိုင်းပဲ သီယာဂို အယ်လ်မာဒါ ရဲ့ လှပတဲ့ အကွက်ကျော် အလှည့်အပြောင်းကနေတစ်ဆင့် ဖာကွန်ဒို မက်ဒီနာ ရဲ့ မြေစိုက်ဖြတ်တင်ဘောကို မက်ဆီ က အောက်ထောင့်ထဲကို အပိုင်ပိတ်သွင်းယူပေးခဲ့ပါတယ်။
ဒုတိယပိုင်းမှာတော့ သြစတြီးယား အသင်းဟာ ဂိုးရလုနီးပါး အခြေအနေမျိုး မဖန်တီးနိုင်ခဲ့ပေမဲ့ အာဂျင်တီးနား ကို တော်တော်လေး ဖိအားပေး ကစားနိုင်ခဲ့ပါတယ်။ ဒါပေမဲ့ ပွဲပြီးခါနီး နောက်ဆုံးကန်ချက်မှာတော့ မက်ဆီ က မျှော်လင့်ထားတဲ့အတိုင်းပဲ အသင်းအတွက် အနိုင်ပွဲကို သေချာစေမဲ့ ဂိုးကို သွင်းယူပေးခဲ့ပါတယ်။
ပထမတော့ ဂျူလီယန် အယ်လ်ဗာရက်ဇ် ဆီကို ဂိုးသွင်းဖို့ ဘောလုံးဖန်တီးပေးခဲ့တာ ဖြစ်ပေမဲ့ ဂိုးဧရိယာထဲမှာ ဘောလုံးလျှံထွက်လာတဲ့အချိန်မှာတော့ အင်တာမိုင်ယာမီ စတား မက်ဆီ ကပဲ ဒုတိယအကြိမ် ထပ်မံကန်သွင်းပြီး ပိုက်ဆက်ထဲ ထည့်သွင်းပေးခဲ့ပါတယ်။ ဒါဟာ သူ့အတွက် နောက်ဆုံး ကမ္ဘာ့ဖလားပြိုင်ပွဲ နှစ်ခုစလုံးရဲ့ နောက်ဆုံး ၆ ပွဲမှာ ၁၀ ဂိုးမြောက် သွင်းယူနိုင်ခဲ့တာလည်း ဖြစ်ပါတယ်။
Source : goal.com
