ဒါဟာ ကမ္ဘာ့ဖလား သမိုင်းတစ်လျှောက် နှစ်ပေါင်းများစွာအတွင်း အကောင်းဆုံး ရွှေဖိနပ်ဆု ပြိုင်ပွဲကြီးဖြစ်လာဖို့ အရှိန်အဟုန်နဲ့ မြန်ဆန်နေပါတယ်။ လီယွန်နယ် မက်ဆီ က ၂ ပွဲကနေ ၅ ဂိုး သွင်းယူပြီး ထိပ်ဆုံးကဦးဆောင်နေပါတယ်။
ကီလီယံ အမ်ဘာပေ နဲ့ ဟာလန်း တို့ကတော့ ၄ ဂိုးစီနဲ့ အဆင့် ၂ နေရာမှာ လိုက်ပါနေကြပါတယ်။ ကမ္ဘာ့ဖလား သမိုင်းတစ်လျှောက်မှာ ပွဲစဉ် ၂ ပွဲအပြီး ကစားသမား ၃ ဦးက ၄ ဂိုး ဒါမှမဟုတ် ၄ ဂိုးထက်ပိုပြီး သွင်းယူနိုင်ခဲ့တာဟာ ဒါနဲ့ဆို ၄ ကြိမ်မြောက်သာ ရှိသေးပြီး ၁၉၅၄ ခုနှစ်နောက်ပိုင်း ပထမဆုံးအကြိမ်လည်း ဖြစ်ပါတယ်။ ဒါဟာ ဘောလုံးလောကရဲ့ အကောင်းဆုံး တိုက်စစ်မှူးအချို့ဆီကနေ တွေ့မြင်ခဲ့ရတဲ့ ထူးခြားဆန်းပြားလှတဲ့ ဂိုးသွင်းယူမှု နာရီအနည်းငယ်ပဲ ဖြစ်ပါတယ်။
မက်ဆီ က အရင်ဆုံး စတင်ခဲ့တာဖြစ်ပြီး အာဂျင်တီးနား အသင်းအတွက် သြစတြီးယား နဲ့ ပွဲမှာ ၂ ဂိုး သွင်းယူကာ ကမ္ဘာ့ဖလား သမိုင်းတစ်လျှောက် ဂိုးသွင်းအများဆုံး စံချိန်ကို ချိုးဖျက်ခဲ့ပါတယ်။
အမ်ဘာပေ ကလည်း ရာသီဥတုကြောင့် ပွဲနှောင့်နှေးခဲ့ရတဲ့ ပြင်သစ် အသင်းရဲ့ အီရတ် နဲ့ ပွဲမှာ သူ့ရဲ့ နိုင်ငံတကာ ပွဲ ၁၀၀ ပြည့်အဖြစ် ၂ ဂိုး သွင်းယူပြီး တုံ့ပြန်ခဲ့ပါတယ်။ အဲ့ဒီနောက်မှာတော့ ဟာလန်း ရဲ့ အလှည့်ရောက်လာခဲ့ပြီး နော်ဝေ အသင်းက ဆီနီဂေါ ကို အနိုင်ရကာ ၃၂ သင်းအဆင့်ကို တက်ရောက်နိုင်ခဲ့တဲ့ပွဲမှာ ၂ ဂိုး သွင်းယူခဲ့ပါတယ်။ သူ့ရဲ့ ကမ္ဘာ့ဖလား ကစားသမားဘဝအတွက် မဆိုးလှတဲ့ အစပြုမှုပါပဲ။
တစ်ယောက် လုပ်နိုင်ရင် နောက်ထပ်လူတွေက ပိုကောင်းအောင် လုပ်နိုင်ကြပါတယ်။ လောလောဆယ်မှာတော့ အဲ့ဒီလို ခံစားချက်မျိုးရှိနေပြီး ဒါဟာ အင်္ဂလန်အသင်းရဲ့ ဟာရီ ကိန်း အနေနဲ့ အင်္ဂါနေ့မှာ ဂါနာ နဲ့ ကစားမဲ့ပွဲမှာ သူ့ရဲ့ အဖွင့်ပွဲစဉ်က ၂ ဂိုးသွင်းစံချိန်ကို ထပ်မံဖြည့်စွက်ဖို့ အခွင့်အရေး မရခင်ကတည်းက ဖြစ်နေတာပါ။ ကမ္ဘာ့အကောင်းဆုံး ကစားသမားတွေဟာ ဒီအားကစားနည်းရဲ့ အကြီးမားဆုံး စင်မြင့်ထက်မှာ စံချိန်တွေကို ရိုက်ချိုးနေကြတာမို့ ထူးခြားတဲ့အရာတစ်ခုကို ကျွန်တော်တို့ မြင်တွေ့နေရပြီဆိုတဲ့ ခံစားချက်က ပိုမိုကြီးထွားလာနေပါတယ်။
ပြင်သစ် ဘောလုံးပညာရှင် ဂျူလီယန် လောရင့်စ် က BBC Sport ကို အခုလို ပြောကြားခဲ့ပါတယ် – “ဒီလို စူပါစတားတွေနဲ့ဆိုရင် သူတို့က ဘောလုံးကို အမြဲတမ်း လိုချင်နေကြတာပါ။ ကျွန်တော် ထင်တာကတော့ သူတို့ဟာ ရွှေဖိနပ်ဆုကိုပဲ လိုက်လံမုဆိုးလုပ်နေကြတာ မဟုတ်ဘဲ တစ်ချိန်လုံးရဲ့ အကောင်းဆုံး စံချိန်ကိုပါ လိုက်လံ မုဆိုးလုပ်နေကြတာ ဖြစ်ပါတယ်”။
ဒီပြိုင်ပွဲ မစတင်ခင်မှာ ဂျာမနီ အသင်းရဲ့ မီရိုစလပ် ကလိုဆေး က ကမ္ဘာ့ဖလား သမိုင်းတစ်လျှောက် ၁၆ ဂိုးနဲ့ ဂိုးသွင်းအများဆုံးဇယားရဲ့ ထိပ်ဆုံးမှာ ရှိနေခဲ့တာပါ။ ပွဲစဉ် ၂ ပွဲ ကစားပြီးချိန်မှာတော့ အသက် ၃၈ နှစ်အရွယ် မက်ဆီ က ကမ္ဘာ့ဖလားပွဲစဉ် ၂၈ ပွဲကနေ ၁၈ ဂိုးနဲ့ အခုပြိုင်ပွဲမှာ အာဂျင်တီးနား ရဲ့ သွင်းဂိုး ၅ ဂိုးစလုံးကို သွင်းယူပြီး ထိပ်ဆုံးက ဦးဆောင်နေပါတယ်။
ဒါပေမဲ့ အမ်ဘာပေ ကလည်း သိပ်နောက်က ကျန်မနေခဲ့ပါဘူး။ ဒီပြင်သစ်သားဟာ ပွဲစဉ် ၁၆ ပွဲမှာ ၁၆ ဂိုး သွင်းယူပြီး ကလိုဆေး ရဲ့ စံချိန်ကိုလိုက်မှီထားကာ ရွှေဖိနပ်ဆု အကြိမ်ကြိမ်ရရှိတဲ့ ပထမဆုံး တိုက်စစ်မှူးဖြစ်လာဖို့ မျက်မှောက်ပြုထားသလို ဟာရီ ကိန်း နဲ့ မက်ဆီ တို့ရဲ့ စုစုပေါင်း သွင်းဂိုးတွေကိုလည်း ကျော်ဖြတ်ဖို့ ရည်မှန်းထားပါတယ်။
လောရင့်စ် က “အခု လီယွန်နယ် မက်ဆီ ပိုင်ဆိုင်ထားတဲ့ မယုံနိုင်စရာ စံချိန်ကို လိုက်လံချိုးဖျက်နေတဲ့ ကီလီယံ အမ်ဘာပေ ရဲ့ ပြပွဲကြီး ထပ်ဖြစ်လာနိုင်တယ်လို့ ကျွန်တော်တို့ ထင်ထားခဲ့တာပါ” လို့ ဆိုပါတယ်။
ဒါဆို မန်ချက်စတာစီးတီး ရဲ့ ဂိုးသွင်းစက်ကြီးဖြစ်တဲ့ ဟာလန်း ရဲ့ စံချိန်တွေအကြောင်းပြောဖို့ ဘယ်လောက်အထိ အချိန်လိုဦးမလဲ။ ဒီပြိုင်ပွဲ အဆုံးသတ်မှာတော့ ဖြစ်လာဦးမှာမဟုတ်ပေမဲ့ သူသာ အခုနှုန်းအတိုင်းဆက်သွားနေမယ်ဆိုရင် အနာဂတ်မှာ ဒီပြိုင်ပွဲထဲ ရောက်လာမှာ သေချာပါတယ်။ အသက် ၂၅ နှစ်အရွယ် ကစားသမားဟာ သူ့ရဲ့ ပထမဆုံး ကမ္ဘာ့ဖလား ပွဲဦးထွက် ၂ ပွဲစလုံးမှာ ၂ ဂိုးစီ သွင်းယူနိုင်ခဲ့တဲ့ ၆ ဦးမြောက် ကစားသမား ဖြစ်လာခဲ့ပြီး နော်ဝေ အသင်းအတွက် ၅၂ ပွဲ ကစားပေးထားရာမှာ ၅၉ ဂိုး ဆိုတဲ့ ထူးခြားတဲ့ သွင်းဂိုးမှတ်တမ်းကို ပိုင်ဆိုင်ထားပါတယ်။
Source : https://www.bbc.com/
