မန်ချက်စတာစီးတီး တိုက်စစ်မှူး ဟာလန်း ဟာ ဒီရာသီမှာ စံချိန်တင် ၄ ကြိမ်မြောက် ပရီးမီးယားလိဂ် ရွှေဖိနပ်ဆုကို မျှော်မှန်းနေပါတယ်။ ၄ ကြိမ်ရရှိဖူးတဲ့ ဆာလာ လီဗာပူး မှာ မရှိတော့တာကြောင့် လမ်းကြောင်းက ပိုပွင့်သွားသလိုဖြစ်နေပေမဲ့ သူ့ကို ဘယ်သူတွေ ယှဉ်ပြိုင်လာနိုင်မလဲဆိုတာ သုံးသပ်ကြည့်ရအောင်ပါ။
ဟာလန်း ဟာ အင်္ဂလန် ဘောလုံးလောကမှာ ဖြတ်သန်းခဲ့တဲ့ ၄ ရာသီအတွင်း ၃ ကြိမ်အထိ ရွှေဖိနပ်ဆု ရရှိထားပါတယ်။ ပွဲပေါင်း ၁၃၂ ပွဲမှာ ၁၁၂ ဂိုး သွင်းယူထားနိုင်လို့ နည်းပြသစ် အန်ဇို မာရက်စ်ကာ လက်အောက်မှာလည်း သူ့ကိုတားဆီးဖို့ ခက်ခဲဦးမှာပါ။
အလက်ဇန္ဒား အီဆာခ် (လီဗာပူး)
ပြီးခဲ့တဲ့ရာသီက ဒဏ်ရာပြဿနာတွေ ရှိခဲ့ပေမဲ့ ၂၀၂၄-၂၅ ရာသီတုန်းက ၂၃ ဂိုးသွင်းပြီး ဟာလန်း ထက် သွင်းဂိုးပိုများကာ ဒုတိယနေရာ ရခဲ့ပါတယ်။ ဒဏ်ရာကင်းစင်ပြီး နည်းပြသစ် အန်ဒိုနီ အီရာအိုလာ ရဲ့ ပံ့ပိုးမှုသာရမယ်ဆိုရင် ပေါင် ၁၂၅ သန်းတန် အဆင့်အတန်းကို ပြသလာနိုင်ပါတယ်။
သီယာဂို (ဘရန့်ဖို့ဒ်)
အင်္ဂလန် မှာ ပထမဆုံး အပြည့်အဝကစားခွင့်ရတဲ့ ရာသီမှာတင် ၂၂ ဂိုးသွင်းပြီး ဟာလန်း ရဲ့နောက် ဒုတိယ ရယူနိုင်ခဲ့ပါတယ်။ ဒီခြေစွမ်းကြောင့် ဘရာဇီးလ် လက်ရွေးစင်အသင်းမှာ ပါဝင်ခွင့်ရခဲ့ပြီး မန်ချက်စတာယူနိုက်တက် အပါအဝင် ကလပ်အသင်းတချို့ရဲ့ စိတ်ဝင်စားမှုကိုပါ ရရှိနေပါတယ်။
ဂျာအို ပတ်ဒရို (ချယ်လ်ဆီး)
ဘရိုက်တန် ကနေ ပြောင်းလာပြီးနောက် ပြီးခဲ့တဲ့ရာသီ ချယ်လ်ဆီး အတွက် ၁၅ ဂိုး သွင်းပေးခဲ့ပါတယ်။ နည်းပြသစ် ဇာဘီ အလွန်ဆို ရဲ့ ကစားကွက်ထဲမှာ ဘယ်လို အံဝင်မလဲဆိုတာက အဓိကကျလာမှာပါ။
ဗစ်တာ ယောကရက်စ် (အာဆင်နယ်)
အာဆင်နယ် နဲ့ ပထမဆုံးရာသီမှာ ပြိုင်ပွဲစုံ ၂၁ ဂိုး (လိဂ်မှာ ၁၄ ဂိုး) သွင်းယူကာ အသင်းရဲ့ ၂၂ နှစ်ကြာ ချန်ပီယံဆု မိုးခေါင်မှုကို အဆုံးသတ်ပေးခဲ့ပါတယ်။ ဒီရာသီမှာ ဖိအားတွေ လျော့သွားပြီဖြစ်လို့ ဂိုးတွေ ပိုမိုသွင်းယူလာနိုင်ခြေ ရှိပါတယ်။
အိုလီ ဝက်ကင်းစ် (အက်စတွန်ဗီလာ)
၂၀၂၀ စက်တင်ဘာကတည်းက ပရီးမီးယားလိဂ် မှာ ၉၁ ဂိုး သွင်းယူထားပြီး ဟာလန်း နဲ့ ဆာလာ တို့နောက် တတိယမြောက် ဂိုးသွင်းအများဆုံး ကစားသမားအဖြစ် ရပ်တည်နေပါတယ်။
ဘန်ဂျမင် ဆက်ရှ်ကို (မန်ယူနိုက်တက်)
မန်ယူနိုက်တက် ရဲ့ ပြီးခဲ့တဲ့ရာသီမှာ ၁၁ ဂိုး သွင်းခဲ့ရာ ၉ ဂိုးဟာ နည်းပြသစ် လက်ထက်မှာ သွင်းယူခဲ့တာပါ။ အသက် ၂၃ နှစ်သာ ရှိသေးတာကြောင့် နည်းပြ မိုက်ကယ် ကာရစ် လက်အောက်မှာ အလားအလာကောင်းတွေ ရှိနေပါတယ်။
ပရီးမီးယားလိဂ် ရွှေဖိနပ်ဆု ၄၂ ကြိမ် ချီးမြှင့်ခဲ့ရာမှာ ၁၂ ကြိမ်သာ ချန်ပီယံအသင်းက ကစားသမားတွေ ရရှိခဲ့တာကြောင့် အသင်းငယ်က တိုက်စစ်မှူးတွေအတွက်လည်း အခွင့်အရေး ရှိနေဆဲ ဖြစ်ပါတယ်။ တောင်ပံတိုက်စစ်ကစားသမားတွေ ဖြစ်ကြတဲ့ ဆွန်ဟောင်မင်၊ ဆာဒီယို မာနေး နဲ့ ရိုနယ်ဒို တို့လည်း ဒီဆုကို ရယူဖူးကြပါတယ်။
Source : https://www.bbc.com/
