ပွဲထွက်လူစာရင်းမှာ မပါဝင်ရဘူးဆိုတာသိသွားပြီးနောက် ဒီတစ်ပတ်မှာ အသင်းကနေထွက်ခွာသွားခဲ့ပေမဲ့ ခရစ္စတီယာနို ရိုနယ်ဒို ဟာ နိုင်ငံရဲ့အကြီးကျယ်ဆုံး ဘောလုံးပြယုဂ်အဖြစ် ဆက်ရှိနေဆဲပဲလို့ ပေါ်တူဂီ ကွင်းလယ်လူ ဘရူနို ဖာနန်ဒက်စ် က ပြောလိုက်ပါတယ်။
အသက် ၄၁ နှစ်အရွယ် ရိုနယ်ဒို ဟာ နေးရှင်းလိဂ်ပြိုင်ပွဲရဲ့ ဒိန်းမတ် နဲ့ပွဲစဉ်မှာ ပွဲထွက်ကစားခွင့်ရမှာမဟုတ်ဘူးလို့ နည်းပြ ဂျော့ချ် ဂျေဆူး က ပြောကြားခဲ့ပြီးနောက် အသင်းကနေ ထွက်ခွာသွားခဲ့တာဖြစ်ပြီး အဆိုပါပွဲမှာတော့ ပေါ်တူဂီ က သူ မပါဘဲ ၄-၂ ဂိုးနဲ့ အနိုင်ရရှိခဲ့ပါတယ်။
ရီးရဲလ်မက်ဒရစ် နဲ့ မန်ချက်စတာယူနိုက်တက် တိုက်စစ်မှူးဟောင်းဟာ ပေါ်တူဂီ အသင်းအတွက် ၂၃၄ ပွဲ ကစားပေးခဲ့ရာမှာ စံချိန်တင် ၁၄၆ ဂိုး သွင်းယူပေးထားပြီး ယူရို ၂၀၁၆ နဲ့ နေးရှင်းလိဂ်ဖလား နှစ်ကြိမ်ရရှိအောင် ကူညီပေးခဲ့သူပါ။ ဒါပေမဲ့ အခုချိန်မှာတော့ သူ့ရဲ့ နိုင်ငံလက်ရွေးစင် ကစားသမားဘဝအနာဂတ်ဟာ မရေမရာ ဖြစ်လာခဲ့ပါပြီ။
စနေနေ့က ပြုလုပ်ခဲ့တဲ့ ပေါ်တူဂီ သတင်းစာရှင်းလင်းပွဲမှာ မန်ချက်စတာယူနိုက်တက် ကစားသမား ဖာနန်ဒက်စ် က
“ခရစ္စတီယာနိုနဲ့ ပတ်သက်ပြီး ကျွန်တော် သူနဲ့စကားပြောခဲ့ပါတယ်။ ကျွန်တော် သူ့ကိုပြောခဲ့သလို ဒီမှာလည်း ထပ်ပြောချင်တာကတော့ ဘာပဲဖြစ်လာဖြစ်လာ ခရစ္စတီယာနို ရိုနယ်ဒို ဟာ ပေါ်တူဂီမှာတင်မကဘဲ တစ်ကမ္ဘာလုံးအတွက် သူလုပ်ဆောင်ပေးခဲ့တဲ့ အရာတွေကြောင့် ကျွန်တော်တို့ လက်ရွေးစင်အသင်း၊ ဘောလုံးလောကနဲ့ နိုင်ငံရဲ့ အကြီးကျယ်ဆုံး ပြယုဂ်အဖြစ်ကနေ ဘယ်တော့မှ ပျောက်ကွယ်သွားမှာ မဟုတ်ပါဘူး။ သူဟာ သမိုင်းတစ်လျှောက် အကောင်းဆုံးတွေထဲမှာ နေရာယူထားသလို ပေါ်တူဂီ ပြည်သူအားလုံးရဲ့ နှလုံးသားထဲမှာလည်း အမြဲရှိနေမှာပါ။ အရေးကြီးဆုံးကတော့ ကျွန်တော်တို့ သဘောထားတွေ ကွဲလွဲမနေဖို့ပါပဲ” လို့ ပြောကြားခဲ့ပါတယ်။
ဆက်လက်ပြီး “လက်ရွေးစင်အသင်းထဲမှာ ဘာအကွဲအပြဲမှ မရှိပါဘူး။ အပြင်က ဘယ်လိုအသံတွေပဲ ထွက်လာပါစေ အသင်းဟာ တစ်စုတစ်စည်းတည်း ရှိနေပြီး ဆက်ပြီးတော့လည်း ဒီလိုပဲရှိနေမှာပါ။ ကျွန်တော်တို့က ဒီအငြင်းပွားမှုတွေရဲ့ အပြင်ဘက်မှာပဲ ရှိနေပေမဲ့ ကျွန်တော်တောင်းဆိုချင်တာက နိုင်ငံအနေနဲ့ အကွဲအပြဲတွေမဖြစ်စေဘဲ ဘက်မလိုက်ဘဲ အားလုံးကိုလေးစားပေးဖို့ပါ။ ခရစ်စ် ဟာ ကျွန်တော်တို့ လက်ရွေးစင်အသင်းရဲ့ အကြီးမားဆုံး အမှတ်သင်္ကေတဖြစ်ခဲ့သလို နောင်လည်း ဆက်ဖြစ်နေဦးမှာပါ။ သူ့ကို ပိုကြိုက်တာ မကြိုက်တာထက် လူတိုင်းရဲ့ လေးစားမှုကို ရထိုက်သူပါ” လို့ ၎င်းက ဖြည့်စွက်ပြောကြားခဲ့ပါတယ်။
ပေါ်တူဂီ အသင်းဟာ ၂၀၁၉ ခုနှစ် နေးရှင်းလိဂ်မှာ ချန်ပီယံဖြစ်ခဲ့သလို ၂၀၂၅ ဗိုလ်လုပွဲမှာလည်း စပိန် ကို ပင်နယ်တီ အဆုံးအဖြတ်နဲ့ အနိုင်ယူပြီး လက်ရှိချန်ပီယံဆုကို ထိန်းသိမ်းထားနိုင်ခဲ့ကာ အဆိုပါ ၂-၂ သရေကျခဲ့တဲ့ပွဲမှာ ရိုနယ်ဒို က အသင်းအတွက် တစ်ဂိုး သွင်းယူပေးခဲ့ပါတယ်။
ပြီးခဲ့တဲ့ နွေရာသီ ကမ္ဘာ့ဖလားပြိုင်ပွဲမှာ ပေါ်တူဂီ ဟာ နောက်ဆုံးမှာ ချန်ပီယံဖြစ်သွားတဲ့ စပိန် ကို ၁-၀ နဲ့ မရှုံးနိမ့်ခင် ၁၆ သင်းအဆင့်အထိ ရောက်ရှိခဲ့ပေမဲ့ အဲ့ဒီအချိန်က နည်းပြ ရောဘတ်တို မာတီနက်စ် ဟာ ရိုနယ်ဒို ခြေစွမ်းမပြနိုင်တဲ့ အချိန်တွေမှာတောင် လူစားလဲဖို့ တွန့်ဆုတ်ခဲ့တာကြောင့် ဝေဖန်ခံခဲ့ရပါတယ်။
ဆော်ဒီကလပ် အယ်လ်နာဆာ မှာ ရိုနယ်ဒို ရဲ့ နည်းပြဖြစ်ခဲ့ဖူးတဲ့ ဂျေဆူး ဟာ နေးရှင်းလိဂ် ပြိုင်ပွဲအတွက် မာတီနက်စ် ရဲ့ နေရာမှာ အစားထိုး တာဝန်ယူခဲ့တာပါ။
ပေါ်တူဂီ ဟာ ဝေးလ် ကို အိမ်ကွင်းမှာ ၁-၀ နဲ့ အနိုင်ရတဲ့ပွဲမှာ ရိုနယ်ဒို ကို ပွဲစပြီး ၆၇ မိနစ်အထိ ထည့်သွင်းအသုံးပြုခဲ့ပေမဲ့ နော်ဝေ ကို အဝေးကွင်းမှာ ၂-၁ နဲ့ အနိုင်ရတဲ့ပွဲမှာတော့ အရန်ခုံမှာပဲထားရှိခဲ့ပြီးနောက် ဒိန်းမတ် နဲ့ ပွဲမတိုင်ခင်မှာ သူဟာ အသင်းလူစာရင်းကနေ ထွက်ခွာသွားခဲ့တာ ဖြစ်ပါတယ်။
သုံးပွဲကစားအပြီးမှာတော့ ပေါ်တူဂီ ဟာ ၉ မှတ် အပြည့်နဲ့ အုပ်စု (A4) ရဲ့ ထိပ်ဆုံးမှာရပ်တည်နေပြီး တနင်္ဂနွေနေ့မှာ နော်ဝေ အသင်းကို အိမ်ကွင်းမှာ လက်ခံကစားရမှာပါ။
သူတို့ဟာ လာမဲ့လ နိုဝင်ဘာ ၁၄ ရက်မှာ ဒိန်းမတ် နဲ့ အိမ်ကွင်းပွဲ၊ နိုဝင်ဘာ ၁၇ ရက်မှာ ဝေးလ် နဲ့ အဝေးကွင်းပွဲတွေ ကစားပြီး အုပ်စုအဆင့်ကို အဆုံးသတ်မှာ ဖြစ်ပါတယ်။ အုပ်စု ထိပ်ဆုံးနှစ်သင်းထဲ ဝင်ရောက်နိုင်ရင်တော့ လာမဲ့ မတ်လမှာ ကွာတားဖိုင်နယ် ကစားရမှာဖြစ်ပြီး ဇွန်လမှာ ဆီမီးဖိုင်နယ်နဲ့ ဗိုလ်လုပွဲတွေကို ဆက်လက်ယှဉ်ပြိုင်ရမှာပါ။
နည်းပြ ဂျေဆူး ကတော့ ရိုနယ်ဒို ဟာ “ပေါ်တူဂီ ရဲ့ ပြယုဂ်တစ်ခုပါပဲ” လို့ ပြောခဲ့သလို ပေါ်တို မြို့မှာ ကစားမဲ့ တနင်္ဂနွေနေ့ပွဲအပြီးကျမှ သူ့အကြောင်းပြောဖို့ အချိန်ရလိမ့်မယ်လို့ ဆိုပါတယ်။
အသက် ၇၂ နှစ်အရွယ် နည်းပြကြီးက “ကျွန်တော် အခု အသင်းအပေါ်မှာပဲ အာရုံစိုက်ထားပါတယ်။ ဥရောပရဲ့ အကောင်းဆုံး ငါးသင်းထဲက တစ်သင်းဖြစ်တဲ့ ပြိုင်ဘက် နော်ဝေ နဲ့ပွဲကိုပဲ အာရုံစိုက်ရမှာပါ။ အခု အရေးကြီးဆုံးက အဲ့ဒီကိစ္စပါပဲ” လို့ ပြောကြားသွားခဲ့ပါတယ်။
Source : https://www.bbc.com/
