ဗင်နီစီးယက်စ် ဂျူနီယာ ဟာ ရီးရဲလ်မက်ဒရစ် အသင်းနဲ့ ၆ နှစ် သက်တမ်းရှိ စာချုပ်သစ် ချုပ်ဆိုလိုက်တာကြောင့် သူ့ရဲ့အနာဂတ်နဲ့ ပတ်သက်ပြီး နွေရာသီမှာထွက်ပေါ်နေတဲ့ သတင်းတွေကို အဆုံးသတ်လိုက်ပါတယ်။ ဆန်တီယာဂို ဘာနေဗျူး မှာ စာချုပ်သက်တမ်း နောက်ဆုံး ၁၂ လထဲ ရောက်ရှိနေတဲ့ အဆိုပါ ဘရာဇီးလ်လက်ရွေးစင် တိုက်စစ်မှူးကိုခေါ်ယူဖို့ အာဆင်နယ် အသင်းက ပြင်းပြင်းထန်ထန် သတင်းထွက်ခဲ့တာပါ။
ရီးရဲလ်မက်ဒရစ် အတွက် ဆုဖလားတစ်လုံးမှ မရရှိခဲ့တဲ့ ခက်ခဲတဲ့ ၂၀၂၅-၂၆ ရာသီအပြီးနဲ့ နည်းပြ ဟိုဆေး မော်ရင်ညို မက်ဒရစ် ကို ရောက်ရှိလာချိန် မရေရာမှုတွေရှိနေစဉ်မှာ ပရီးမီးယားလိဂ် ချန်ပီယံအသင်းက စိတ်ဝင်စားခဲ့ပေမဲ့ ဗင်နီစီးယက်စ် ကတော့ စပိန်ကလပ်မှာပဲ ရေရှည်ဆက်ရှိနေဖို့ ဆုံးဖြတ်ခဲ့ပါတယ်။
“ရီးရဲလ်မက်ဒရစ် အသင်းနဲ့ ကစားသမား ဗင်နီစီးယက်စ် ဂျူနီယာ တို့ဟာ ၂၀၃၂ ခုနှစ် ဇွန်လ ၃၀ ရက်အထိ အသင်းမှာဆက်ရှိနေမယ့် စာချုပ်သက်တမ်းတိုးမြှင့်မှုအတွက် သဘောတူညီမှု ရရှိခဲ့ပါတယ်” လို့ ကလပ်အသင်းရဲ့ ထုတ်ပြန်ချက်မှာ ဖော်ပြထားပါတယ်။
“ဗင်နီစီးယက်စ် ဂျူနီယာ ဟာ ၂၀၁၈ ခုနှစ် ဇူလိုင်လမှာ အသက် ၁၈ နှစ်အရွယ်နဲ့ ရီးရဲလ်မက်ဒရစ် ကို ရောက်ရှိလာခဲ့တာပါ။ အသင်းဂျာစီကို ဝတ်ဆင်ခဲ့တဲ့ ၈ ရာသီအတွင်းမှာ သူဟာ ၃၇၅ ပွဲ ကစားခဲ့ပြီး ၁၂၈ ဂိုး သွင်းယူကာ ဆုဖလား ၁၄ လုံး ရရှိခဲ့ပါတယ်။ အဲဒီအထဲမှာ ချန်ပီယံလိဂ် ၂ ကြိမ်၊ ကလပ်ကမ္ဘာ့ဖလား ၃ ကြိမ်၊ ဥရောပစူပါဖလား ၂ ကြိမ်၊ လာလီဂါ ၃ ကြိမ်၊ ကိုပါဒယ်ရေး ၁ ကြိမ်နဲ့ စပိန်စူပါဖလား ၃ ကြိမ် ပါဝင်ပါတယ်။ ဒီဆုဖလားတွေ ရရှိအောင် ပါဝင်ကူညီမှုဟာ သူ့ရဲ့ကစားဟန်၊ ဂိုးဖန်တီးမှုနဲ့ ဂိုးသွင်းယူမှုတွေကြောင့် အဓိက သေချာခဲ့တာဖြစ်ပါတယ်” လို့ ပါရှိပါတယ်။
ဗင်နီစီးယက်စ် ကလည်း အင်စတာဂရမ်မှာ “ဘာနေဗျူး မှာ ၈ နှစ်ဆိုတာ နည်းလွန်းပါသေးတယ် … နောက်ထပ် ၆ နှစ်၊ ပြီးတော့ ထာဝရအတွက်ပါပဲ” လို့ ရေးသားခဲ့ပါတယ်။
အသက် ၂၆ နှစ်အရွယ်ရှိ ဗင်နီစီးယက်စ် ဟာ အင်္ဂါနေ့က ကလပ်အသင်းနဲ့ ပြုလုပ်ခဲ့တဲ့ အင်တာဗျူးတစ်ခုမှာ နည်းပြ ဟိုဆေး မော်ရင်ညို က ခက်ခဲတဲ့အချိန်တွေကို ဖြတ်သန်းခဲ့ရပြီးနောက် သူ့ကို “ပျော်ရွှင်” စေချင်ကြောင်း ပြောကြားခဲ့ပုံကို ထုတ်ဖော်ပြောဆိုခဲ့ပြီး အသင်းမှာဆက်ရှိနေမဲ့ အရိပ်အမြွက် ပြသခဲ့တာပါ။
အမေရိကမှာ ပြုလုပ်ခဲ့တဲ့ ကမ္ဘာ့ဖလား ပြိုင်ပွဲရဲ့ ၁၆ အသင်းအဆင့်ကနေ ဘရာဇီးလ်အသင်း အံ့အားသင့်ဖွယ် ထွက်ခွာခဲ့ရတာကလည်း ဗင်နီစီးယက်စ် အတွက် စိတ်ပျက်စရာ ၁၂ လတာ ကာလကို တိုးပွားစေခဲ့ပါတယ်။ ဒါပေမဲ့ အနာဂတ်အတွက် သေချာသွားပြီဖြစ်တဲ့ ဖလင်းမန်းဂိုး လူငယ်ကြယ်ပွင့်ဟောင်းဟာ ဟိုဆေး မော်ရင်ညို လက်အောက်မှာ ရီးရဲလ်မက်ဒရစ် အသင်းကို အဓိက ဆုဖလားတွေ ပြန်လည်စိန်ခေါ်နိုင်အောင် ကူညီပေးဖို့ ပစ်မှတ်ထားသွားမှာပါ။
ဗင်နီစီးယက်စ် ကို စာချုပ်သစ်ချုပ်ဆိုနိုင်ခဲ့တာဟာ အပြောင်းအရွှေ့ဈေးကွက်မှာ လှုပ်ရှားနေတဲ့ ရီးရဲလ်မက်ဒရစ် အတွက် အရေးပါတဲ့ ခြေလှမ်းတစ်ခုလည်း ဖြစ်ပါတယ်။ ရီးရဲလ်မက်ဒရစ် အသင်းဟာ တောင်ပံကစားသမား ယန်း ဒီယိုမန်ဒေ၊ ကွင်းလယ်လူ ဘာနာဒို ဆီးလ်ဗား၊ ဗဟိုခံစစ်မှူး အီဘရာဟီမာ ကွန်နတေ၊ ဘယ်နောက်ခံလူ မက် ကူကူရယ်လာ နဲ့ တောင်ပံခံစစ်မှူး ဒန်ဇဲလ် ဒမ်းဖရီးစ် တို့ကိုလည်း အသင်းဆီ ခေါ်ယူအားဖြည့်ထားပါတယ်။
Source : https://www.theguardian.com/
