အာဆင်နယ်အသင်းဟာ လစ္စဘွန်းမှာ ကစားခဲ့တဲ့ ချန်ပီယံလိဂ် ကွာတားဖိုင်နယ် ပထမအကျော့ပွဲစဉ်မှာ ကိုင် ဟာဗက်ဇ် ရဲ့ ပွဲပြီးခါနီး အနိုင်ဂိုးနဲ့ စပို့တင်းအသင်းကို ၁-၀ နဲ့ အနိုင်ရရှိခဲ့ပါတယ်။ လူစားဝင်ကစားသမား ဟာဗက်ဇ် ဟာ ပွဲပြီးခါနီးမှာ ဂိုးသမား ရူအီ ဆေးလ်ဗား ကို ကျော်ဖြတ်ပြီး အဖိုးတန်ဂိုးကို သွင်းယူပေးခဲ့တာပါ။ ဒါကြောင့် လာမဲ့အပတ် အမ်မရိတ်ကွင်းမှာ ကစားရမဲ့ ဒုတိယအကျော့ပွဲစဉ်မတိုင်ခင် ပရီးမီးယားလိဂ်ဇယားထိပ်က အာဆင်နယ်အတွက် အားသာချက် ရရှိသွားစေခဲ့ပါတယ်။
ဒီရာသီမှာ ပထမဆုံးအကြိမ်အဖြစ် နှစ်ပွဲဆက်တိုက် ရှုံးနိမ့်ထားတဲ့ အာဆင်နယ်အတွက် ဒီပွဲက တကယ့်ကို ဖိအားများခဲ့တာပါ။ စပို့တင်း ဘယ်နောက်ခံလူ မက်ဇီ အာရာအူဂျို ရဲ့ ကန်ချက် ဂိုးဘားတန်းထိထွက်သွားခဲ့လို့ အာဆင်နယ်တို့ ပွဲအစောပိုင်းမှာတင် ရင်တုန်ခဲ့ရပါသေးတယ်။ အာဆင်နယ်ဟာ ပထမပိုင်းမှာ ဘောလုံးပိုင်ဆိုင်မှု အသာစီးရခဲ့ပေမဲ့ ဂိုးသွင်းခွင့်အပြတ်အသတ်တော့ မရခဲ့ပါဘူး။ နိုနီ မာဒူးအက်ကီ ရဲ့ ထောင့်ကန်ဘောကနေ တိုက်ရိုက်ကန်ချက် ဂိုးဘားတန်းထိခဲ့တာက သူတို့အတွက် အနီးစပ်ဆုံး အခြေအနေပါပဲ။
စပို့တင်းကလည်း တန်ပြန်တိုက်စစ်တွေနဲ့ အဆက်မပြတ် ခြိမ်းခြောက်နိုင်ခဲ့ပြီး ထရင်ကာအို ရဲ့ ကန်ချက် လွဲချော်သွားခဲ့လို့ အာဆင်နယ်တို့ သက်သာရာရခဲ့ပါတယ်။ ဒုတိယပိုင်းမှာ မာတင် ဇူဘီမန်ဒီ က အာဆင်နယ်အတွက် ဂိုးသွင်းယူနိုင်ခဲ့ပေမဲ့ စပို့တင်းတိုက်စစ်မှူးဟောင်း ဗစ်တာ ယောကရက်စ် က လူကျွံနေခဲ့တာကြောင့် အဲ့ဒီဂိုးကို ပယ်ဖျက်ခြင်း ခံခဲ့ရပါတယ်။ ပွဲပြီးခါနီးမှာ စပို့တင်းဘက်က အပြင်းအထန် ဖိအားပေးလာခဲ့ပေမဲ့ ဂိုးသမား ဒေးဗစ် ရာယာ က အကောင်းဆုံး ကာကွယ်မှု ၃ ကြိမ် ပြုလုပ်ပြီး ဂိုးမပေးရအောင် တားဆီးနိုင်ခဲ့ပါတယ်။ အဲ့ဒီနောက်မှာတော့ ဟာဗက်ဇ် က အာဆင်နယ်အတွက် အနိုင်ဂိုးကို အရယူပေးသွားခဲ့တာပါ။
ဒီနိုင်ပွဲဟာ အာဆင်နယ်အတွက် ၃ ပွဲမြောက်မှာ ပထမဆုံးရတဲ့ နိုင်ပွဲဖြစ်ပြီး လာမဲ့အပတ် ဘုန်းမောက်နဲ့ ပရီးမီးယားလိဂ်ပွဲမတိုင်ခင် အာတီတာ ရဲ့ အသင်းအတွက် ယုံကြည်မှု တိုးစေမှာပါ။ မန်စီးတီးနဲ့ ဆောက်သမ်တန် တို့ကို ရှုံးနိမ့်ခဲ့တဲ့ စိတ်ပျက်စရာတွေကို ဒီနိုင်ပွဲက ကုစားပေးနိုင်ခဲ့ပြီး အခုဆိုရင် ကစားသမားတွေအနေနဲ့ လွတ်လွတ်လပ်လပ် ပြန်ကစားနိုင်တော့မှာပါ။ ဒါပေမဲ့ စိတ်မကောင်းစရာ တစ်ခုကတော့ အသင်းခေါင်းဆောင် အိုဒီဂတ် ဒဏ်ရာကြောင့် လူစားလဲခံခဲ့ရတာပါပဲ။
Source : https://www.bbc.com/
